Bibele yi lo hontlo hi swikombiso swa swikhongelo leswi hlamuriweke hi Yehovha. Loko malandza ya Xikwembu ma vona ndlela leyi xi xiyeke swikarhato swa vona ni ku tlhela xi va pfuna, ripfumelo ra vona ri ye ri tiya swinene. Hikwalaho, i swa nkoka leswaku hi swi boxa hi ku kongoma leswi hi swi khongelelaka kutani hi ringeta ku vona ndlela leyi Yehovha a hi hlamulaka hayona. Tsundzuka leswaku nhlamulo ya kona yi nga hambana ni leswi hi swi languteleke kumbe ku va swo tlula leswi hi swi kombeleke. (2Ko 12:7-9; Ef 3:20) I yini leswi Yehovha a nga hi nyikaka swona loko a hi hlamula eka leswi hi swi kombeleke?

• A nga hi nyika matimba, kurhula ni ripfumelo leri tiyeke leswaku hi kota ku langutana ni xiphiqo xo karhi.—Flp 4:13

• A nga hi nyika vutlhari byo kota ku endla swiboho leswinene.—Yk 1:5

• A nga hi nyika matimba yo navela ku endla swo karhi.—Flp 2:13

• A nga hi nyika kurhula loko hi vilela.—Flp 4:6, 7

• A nga endla leswaku van’wana va hi pfuna hileswi hi swi lavaka, va hi chavelela ni ku hi khutaza.—1Yh 3:17, 18

• A nga pfuna lava hi va khongelelaka.—Mi 12:5, 11

HLALELANI VHIDIYO LEYI NGE, YEHOVHA I “MUTWI WA XIKHONGELO” KUTANI MI HLAMULA SWIVUTISO LESWI LANDZELAKA:

• Ntokoto wa Makwerhu Shimizu wu nga hi khutaza njhani loko hi nga koti ku endla swo tala hikwalaho ka swiphiqo swa rihanyo?

• Hi nga xi tekelela njhani xikombiso xa Makwerhu Shimizu?