Broxara leyi nge Yingisa Xikwembu yi endleriwe ku dyondzisa tidyondzo ta xisekelo ta Bibele ngopfungopfu eka vanhu lava swi va tikelaka ku hlaya. Dyondzo yin’wana ni yin’wana leyi nga ni matluka mambirhi yi ni swifaniso leswi lunghiseleriweke hi vukheta leswi nga ni miseve leyi kombetelaka eka xifaniso lexi kombisaka mhaka leyi mi nga ta bula hi yona.

Broxara leyi nge Yingisa Xikwembu Kutani U Hanya Hilaha Ku Nga Heriki yi ni swifaniso leswi fanaka ni swa broxara leyi nge Yingisa Xikwembu, kambe leyo sungula yi ni rungula ro tala leri nga tirhisiwaka hi xichudeni lexi hlayaka kahle. Hakanyingi vahuweleri va tsakela ku khoma yona loko xichudeni xi khome broxara leyi nge Yingisa Xikwembu. Matluka yo tala ma ni bokisi leri nga ni rungula leri engetelekeke leri ku nga buriwaka ha rona, kambe sweswo swi ta ya hi vuswikoti bya xichudeni.

U nga ti fambisa nkarhi wun’wana ni wun’wana tibroxara leti, hambi ku nga fambisiwi tona nh’weti yoleyo. Loko u fambisa dyondzo ya Bibele, tirhisa swifaniso leswaku u hlamusela rungula ra le Bibeleni. Vutisa swivutiso leswaku xichudeni xi katseka eka bulo ku tiyiseka leswaku leswi mi swi dyondzaka xa swi twisisa. Hlayani mi tlhela mi bula hi matsalwa lama nga ehansi ka tluka rin’wana ni rin’wana. Endzhaku ka loko mi hete ku hlaya broxara leyi, dyondzani buku leyi nge Xana Bibele Yi Dyondzisa Yini Hakunene? kumbe leyi nge I Yini Leswi Hi Nga Swi Dyondzaka eBibeleni? leswaku u ta pfuna xichudeni xa wena ku lunghekela ku khuvuriwa.