LEXI ENDLAKA SWI VA SWA NKOKA: Buku ya Vakorinto vo Sungula i rin’wana ra mapapila ya 14 lawa muapostola Pawulo a ma tsaleke leswaku a khutaza Vakrestekulobye. Loko munhu a tsala papila u ni nkarhi wo ma hlawula hi vukheta marito lawa a ma tsalaka naswona munhu loyi a tsaleriweke a nga ha ri hlaya hi ku phindhaphindha papila rero. Mapapila ma pfuna ngopfu loko swi ta emhakeni yo chumayela maxaka ni vanghana. Ma nga tlhela ma hi pfuna ku chumayela vanhu lava swi nga kotekiki ku hlangana na vona. Hi xikombiso, un’wana a nga ha tsakela ku dyondza Bibele kambe u kuma leswaku a nga kumeki ekaya. Van’wana swi nga ha tika ku va kuma hikuva va tshama etindhawini leti ku nga pfumeleriwiki mani na mani ku nghena eka tona. Hi swihi swilo swin’wana leswi hi faneleke hi swi tsundzuka ngopfungopfu loko hi tsalela vanhu lava hi nga va tiviki?

NDLELA LEYI U NGA SWI ENDLAKA HA YONA:

• Tsala leswi a wu ta swi vula loko a wu vulavula na yena mi langutanile. Titivise to ho suka u tlhela u boxa ni xivangelo lexi endlaka u tsala papila rero. U nga ha n’wi vutisa xivutiso xo anakanyisisa ha xona kutani u n’wi kongomisa eka website ya hina. N’wi byele hi Dyondzo Ya Bibele Ya Le Ka website, ni ndlela leyi hi dyondzaka Bibele ha yona ni vanhu emakaya kumbe u tsala tindzima to karhi leti nga eka yin’wana ya tibuku leti hi ti tirhisaka ku dyondza ni vanhu. U nga ha hoxa ni khadi ro pfuna ku nghena eka jw.org, xirhambo kumbe xiphephana eka mvhilopho

• Komisa. U nga lehisi lerova muhlayi a tshika a nga si heta ni ku ri hlaya.—Vona xikombiso xa matsalelo ya papila

• Ri kambele ku vona loko ri nga ri na swihoxo u tlhela u tsala swi vonaka kahle. Ri tsale hi ndlela ya xinghana, leyi khutazaka naswona u va ni vuxiyaxiya. Vekela switempe leswi ringaneke