Paseka ya Yesu yo hetelela a yi ta va ya nkoka. Leswi a a ta dlayiwa ku nga ri khale u endle Paseka ni vaapostola vakwe, a simeka Xilalelo Xa Hosi lexi a xi ta va kona lembe ni lembe. U rhume Petro na Yohane leswaku va ya lulamisa kamara. (Lk 22:7-13; vona xifaniso xa xifunengeto.) Leswi swi hi tsundzuxa leswaku na hina hi fanele hi ti lulamisela Xitsundzuxo lexi hi nga ta va na xona hi March 27. Swi nga ha endleka vandlha ri kume xivulavuri, swifanekiselo swa Xitsundzuxo ni swin’wana. Nilokoswiritano, i yini leswi un’wana ni un’wana wa hina a nga swi endlaka leswaku a lunghekela Xitsundzuxo?

Lulamisa mbilu ya wena. Hlaya u tlhela u anakanyisisa hi Matsalwa lama vulavulaka hi Xitsundzuxo. Xiyimiso xa kona u nga xi kuma eka xibukwana xa Ku Kambisisa Matsalwa Siku Ni Siku. Leswaku u kuma rungula leri engetelekeke u nga ya eka xiengetelo xa B12 lexi nga eka Bibele ya Matsalwa Yo Kwetsima Ya Misava Leyintshwa. (Tlhela u vona Xiyimiso Xa Mahanyelo Ni Ntirho Wa Hina Wo Chumayela xa April 2020.) Mindyangu yi nga kuma rungula leri va nga ri tirhisaka eka vugandzeri bya ndyangu mayelana ni nkoka wa nkutsulo eka Watch Tower Publications Index kumbe Nkongomiso Wo Endla Ndzavisiso Wa Timbhoni Ta Yehovha.

Rhamba van’wana. Vana kona eka tsima ro fambisa swirhambo. Ehleketa hi lava u nga va rhambaka, ku nga ha va lava u nga tshama u va chumayela, lava u nga tshama u dyondza na vona, lava u nga va tolovela kumbe maxaka ya wena. Vakulu va fanele va rhamba lava nga ha teki etinhlengeletanwini ta vandlha. Tsundzuka leswaku loko munhu loyi u n’wi rhambaka a nga tshami endhawini ya ka n’wina, u nga kuma ndhawu leyi Xitsundzuxo xi nga ta khomeriwa eka yona endhawini ya ka vona hi ku nghena eka jw.org/ts u languta eka tlukankulu kutani u ya eka MALUNGHANA NA HINA u nghena eka “Xitsundzuxo.”

I yini swin’wana leswi u nga swi endlaka leswaku u lunghekela Xitsundzuxo?