Ku nga ri khale Yehovha u ta tshika ku lehisa mbilu. Vukhongeri bya mavunwa byi ta herisiwa, matiko lama hlanganeke ma ta hlasela vanhu va Xikwembu naswona Yehovha u ta hlasela lavo homboloka eArmagedoni. Vakreste va swi langutele hi mahlo ngati swiendlakalo leswi swa nkoka.

I ntiyiso leswaku a hi byi tivi hinkwabyo vuxokoxoko hi nhlomulo lowukulu. Hi xikombiso, a hi swi tivi hi ku kongoma leswaku wu ya sungula rini. A hi swi tivi swivangelo leswi nga ta endla va swa tipolotiki va hlasela vukhongeri. A hi swi tivi leswaku nhlaselo wa matiko eka vanhu va Xikwembu wu ta teka nkarhi wo tanihikwihi kumbe leswaku wu ta katsa yini. Nakambe a hi swi tivi hi ku kongoma leswaku Yehovha u ta tirhisa yini ku herisa lavo homboloka eArmagedoni.

Hambiswiritano, Matsalwa ma hi nyika rungula hinkwaro leri hi ri lavaka leswaku hi kota ku languta vumundzuku hi ri ni ntshembo ni xivindzi. Hi xikombiso, ha swi tiva leswaku hi hanya emakumu ka ‘masiku yo hetelela.’ (2Tm 3:1) Ha swi tiva leswaku nhlaselo wa vukhongeri wu ta ‘hungutiwa’ leswaku vukhongeri bya ntiyiso byi nga hlaseriwi. (Mt 24:22) Ha swi tiva leswaku Yehovha u ta ponisa vanhu vakwe. (2Pe 2:9) Nakambe ha swi tiva leswaku Loyi Yehovha a n’wi hlawuleke leswaku a lovisa lavo homboloka a tlhela a ponisa ntshungu lowukulu eArmagedoni u lulamile naswona u ni matimba.—Nhl 19:11, 15, 16.

Swiendlakalo leswa ha taka swi ta endla leswaku vanhu va “titivala hikwalaho ko chava.” Hambiswiritano, ku hlaya ni ku anakanyisisa hi ndlela leyi Yehovha a va poniseke hayona vanhu vakwe enkarhini lowu hundzeke ni leswi a hi paluxeleke vumundzuku, hi nga ‘yima hi ololoxa tinhloko,’ hi tiyiseka leswaku ku kutsuriwa ka hina ku le kusuhi.—Lk 21:26, 28.