Timbhoni ta Yehovha ti xanisiwa hi tihanyi aEritrea. Mfumo wa Eritrea a wu tshamela ku pfalela ni ku xanisa Timbhoni ta Yehovha ku sukela loko wu kume ntshunxeko hi 1993. Xiviko lexi humesiweke hi presidente hi October 25, 1994, xi vule leswaku Timbhoni ta le Eritrea ti “lahle lunghelo ra tona ro va vaakatiko” loko ti ale ku katseka eka tipolitiki kumbe ku nghenela vusocha. Kutani mfumo wu tekele Timbhoni timfanelo ta tona.

Eka malembe lawa Timbhoni a ti khomiwa ha wona ni ku xanisiwa, to tala ti boheke ku baleka etikweni. Leti saleke, ti xanisiwa hi tihanyi minkarhi yo tala naswona ti boheka ku va ni vuxiyaxiya swinene loko ti endla ntirho wihi na wihi wa vukhongeri. Swi ni malembe maphorisa ya le Eritrea ma ri karhi khoma ni ku pfalela Timbhoni—tin’wana ti khomiwa hikwalaho ko ala ku ya evusocheni hileswi ripfalo ra tona ri nga ti pfumeleriki kasi tin’wana hikwalaho ka leswi ti yaka eminhlanganweni ya vukhongeri, ku vulavurisana ni van’wana hi Bibele kumbe hi swivangelo leswi nga boxiwiki. Leti pfaleriwaka ti katsa vadyuhari, vavasati naswona minkarhi yin’wana ni vana. Ku ni vavanuna vanharhu lava nga Timbhoni lava se va nga ni malembe ya 20 va pfaleriwile. Ku hava ni un’we wa vona loyi a byeriweke leswaku a a khomeriwa yini naswona a va se yisiwa ehubyeni ku ya tengisiwa ni ku gweviwa.

Ku xanisiwa ka Timbhoni ta Yehovha aEritrea ku xiyiwile emisaveni hinkwayo. Vafumi va le Afrika, Yuropa ni le United States va ringetile ku vulavurisana ni valawuri va Eritrea, kambe ko fana ni kwala. Timbhoni ti tlhele ti endla swikombelo swo hlaya eka valawuri va Eritrea leswaku va ta hlangana va vulavurisana ni ku tlhantlha swiphiqo leswi kambe valawuri va arile.