Hi ti 12 ta October 2017, Khoto Ya Yuropa Ya Timfanelo Ta Vanhu (ECHR) yi vone tiko ra Georgia nandzu wo kandziyela timfanelo ta Timbhoni ta Yehovha ta khume. Emhakeni ya loko Gabunia ni van’wana va mangalele tiko ra Georgia, mfumo wolowo wu pfumele ku va hakela mali yo ringana R13 378 hi munhu, hi leswi wu kandziyeleke timfanelo ta ntshunxeko wa vukhongeri bya vona ni ku va wu ve ni xihlawuhlawu leswi lwisanaka ni nawu lowu nga eka atikili 9 na 14 ya timfanelo ta vanhu.

Hi September 2005, Timbhoni ta Yehovha ta khume ti yise xivilelo eka khoto ya le Yuropa mayelana ni leswi ti hlaseriweke ka mune hi mintshungu leyi pfukelaka leyi a yi kuceteriwa hi kereke ya Orthodox. Swiendlakalo leswi swa mune swo lwisana ni Timbhoni ta Yehovha eGeorgia leswi sunguleke hi 1999 ku ya fikela hi November 2003 a swi seketeriwa hi mfumo. Valawuri va katsekile eka minhlaselo leyi hikuva hambiloko va nga katsekanga hi ku kongoma eka yona va tsandzeke ku sirhelela Timbhoni ta Yehovha. Loko ku nga si tengiwa nandzu wa Gabunia, Khoto ya Yuropa ya timfanelo ta vanhu yi vone tiko ra Georgia milandzu yinharhu. Yi vule leswaku tiko rero ri tsandzeke ku sirhelela Timbhoni ta Yehovha loko ti hlaseriwa hi nkarhi wolowo. Yi tlhele yi vula leswaku ku va maphorisa ma nga nghenelelanga, “vaakatiko a va ta va teka tanihi vatirhela mfumo lava nga tshembekangiki etikweni.” Yi tlhele yi gimeta hi ku vula leswaku “leswi valawuri va Georgia va nga va xupulangiki vanhu lava xaniseke Timbhoni ta Yehovha etikweni swi endle leswaku van’wana na vona va ya emahlweni va ti xanisa va nga chavi nchumu.” Khoto ya Yuropa yo yimela timfanelo ta vanhu yi kume leswaku vaavanyisi lava a va avanyisa eka nandzu lowu a va avanyisangi kahle va kombise “xihlawuhlawu” hikuva a va yimelela vamangaleriwa loko ku ri karhi ku tengiwa nandzu.

Ku va tiko ra Georgia ri pfumerile leswaku ri kombise xihlawuhlawu ni ku “va ri tisorile” hi leswi ri kandziyeleke timfanelo ta vanhu, ri papalate vuavanyisi bya vumune naswona a swi kanakanisi leswaku a ri ta tlhela ri soriwa hi milandzu leyi veke kona eka vuavanyisi byinharhu lebyi hundzeke. Namuntlha Timbhoni ta Yehovha ta le Georgia a ta ha xanisiwi. Sweswi ta tiphina hi ku gandzela ti ntshunxekile.