ESEOUL, le Korea—Hi ku ya hi nkambisiso wa sweswinyana wa Gallup, sweswi vanhu vo tala va le Korea va tsakela leswaku hulumendhe ya vona yi nyika vanhu lava alaka ku ya evusocheni hikwalaho ka ripfalo ra vona mintirho yin’wana yo korhokela tiko. Ku sukela hi November 4-7, 2013, vavanuna ni vavasati va 1 211 va le Korea va hlanganyele eka nkambisiso lowu naswona ku kumiwe leswaku vanhu lava endlaka 68 wa tiphesente va tsakela leswaku vanhu lava alaka ku ya evusocheni hikwalaho ka ripfalo ra vona va nyikiwa mintirho yin’wana yo korhokela tiko ematshan’weni yo va va pfaleriwa ekhotsweni. Tinhlayo leti ti kombisa ku cinca ka mavonelo ya vanhu tanihi leswi eka nkambisiso lowu fanaka lowu endliweke hi 2008 ku kumiweke leswaku i vanhu lava endlaka tiphesente ta 29 ntsena lava a va tsakela leswaku ku va ni mintirho yin’wana yo korhokela tiko.

Swi tikomba onge ni vativi van’wana va ta nawu eKorea va nga tsakela leswaku lava alaka ku ya evusocheni hikwalaho ka ripfalo ra vona va nyikiwa mintirho yin’wana yo korhokela tiko leyi va nga yi hlawulaka handle ko pfaleriwa ekhotsweni. Ebukwini yakwe leyi nge “Dilemma Surrounding Conscientious Objection to Military Service,” Han In-seop, profesa wa le Seoul National University, School of Law, u tsale a ku: “Ku hava muavanyisi loyi a nga vulaka leswaku lava alaka ku ya evusocheni va ni nandzu wo tlula nawu wa mahanyelo kumbe wa ntshamisano. Hambi ku ri phepha ra leswaku lava alaka ku ya evusocheni va pfaleriwa loko va ha rindze ku tengisiwa a ri humesiwi hikuva huvo ya swi tiva leswaku a va nge baleki. Vaavanyisi va twa ku vava ni ku va twela vusiwana nkarhi wun’wana ni wun’wana loko va teka xiboho xo va vona nandzu.”

Mhaka leyi ya timfanelo ta vanhu ya ha ku kandziyisiwa sweswinyana eka filimi leyi humesiweke hi National Human Rights Commission of Korea. Filimi leyi yi katsa xiphemu lexi nga ni nhloko-mhaka leyi nge “Ice River (Nambu Lowu Nga Ayisi),” lexi kombisaka Mbhoni yin’wana ya Yehovha leyi aleke ku ya evusocheni. Mukongomisi wa filimi leyi u vule leswaku u teke xiboho xo yi endla endzhaku ko twa leswaku ku ni Timbhoni ta madzana leti pfaleriwaka ekhotsweni lembe ni lembe hikwalaho ko ala ku ya evusocheni. Hi ku ya hi xiviko xa United Nations Human Rights Council lexi kandziyisiweke hi June 2013, Timbhoni leti endlaka 93 wa tiphesente leti khotsiweke emisaveni hinkwayo hikwalaho ko ala ku ya evusocheni ti pfaleriwe eKorea Dzonga.

Media Contact(s):

International: J. R. Brown, Office of Public Information, tel. +1 718 560 5000

Republic of Korea: Dae-il Hong, tel. +82 31 690 0055

Afrika-Dzonga: Mzamo Goloda, +27 11-761-1000