Hi May 12, 2015, Huvo ya le dorobeni ra Gwangju yi teke xiboho xa leswaku Timbhoni tinharhu ta Yehovha a ti na nandzu wo balekela ku ya evusocheni. Muavanyisinkulu Choi, Chang-seok u vule leswi eka xiboho lexi a xi humeseke: “I swa nkoka leswaku ntshunxeko wa ripfalo wu hlamuseriwa hi ku ya hi Vumbiwa ni vutihlamuleri byo sirhelela tiko byi hlamuseriwa hi ndlela leyi fanaka.” U tlhele a ku: “Loko timfanelo ta xisekelo ti lwisana ni swilaveko swin’wana swa tiko swo tanihi vutihlamuleri bya muakatiko, nawu wu fanele wu hlamuseriwa hi ndlela leyi swilaveko haswimbirhi swi nga fikeleriwaka kahle hilaha swi nga kotekaka hakona.” Timbhoni ti langutele leswaku muchuchisi a hoxa xikombelo xo va xiboho lexi xi kambisisiwa hi vuntshwa ku nga si hela masiku ya nkombo.