SYDNEY—Tindhambi letikulu ti funengete ndhawu ya le vuxeni bya Australia tanihi leswi masalela ya Xidzedze xa Oswald ma vangeke timpfula exifundzheni xa Queensland ni le n’walungwini wa New South Wales. Ku fe mune wa vanhu naswona lava tlulaka 1 000 va susiwe emakaya ya vona. Doroba ra Bundaberg, leri nga exikarhi ka ribuwa ra Queensland, hi rona leri hlaseriweke swinene tanihi leswi xidzedze lexi xi vangeke tin’wana ta tindhambi letikulu leti nga si tshamaka ti va kona emalembeni yo tlula dzana lama hundzeke naswona xi vangeke swihuhuri swa ntlhanu.

Rhavi ra Timbhoni ta Yehovha eSydney ri vike leswaku ku hava Timbhoni leti feke kumbe leti vavisekeke. Hambiswiritano, tiyindlu ta 53 ta Timbhoni eBundaberg ti onhakile kutani ti siya vanhu vo tlula 70 va nga ri na makaya. Lava susiweke emakaya naswona van’wana va vona va ponisiweke hi swihaha-mpfhuka-phatsa, va rhurheriwe hi vaakelani kumbe Timbhoni-kulobye leti tshamaka kwalaho.

Vakulu va kwalaho lava nga Timbhoni va vumbe komiti ya mphalalo leswaku va phalala vanhu. Endhawini ya Bundaberg, Timbhoni leti tlulaka 250 ti tlhele ti tinyikela ku pfuneta naswona tin’wana ti suke endhawini leyi nga ekule hi tikhilomitara leti tlulaka 60 leswaku ti ta ta pfuna lava hlaseriweke.

Media Contacts:

International: J. R. Brown, Office of Public Information, tel. +1 718 560 5000

Australia: Donald MacLean, tel. +61 2 9829 5600

Afrika-Dzonga: Mzamo Goloda, +27 11-761-1000