Ntlawa wa Nhlangano wa Matiko lowu Tirhanaka ni ku Khotsiwa swi nga Fanelanga wu kombele Azerbaijan leswaku ri ntshunxa Irina Zakharchenko na Valida Jabrayilova.Wu vula leswaku Azerbaijan ri va khotse swi nga fanelanga hikwalaho ko tirhisa timfanelo ta vona to gandzela hi ku ntshunxeka, ni ku va kombisa xihlawuhlawu hikwalaho ka vukhongeri bya vona swin’we ni leswi ri tsandzekeke ku yingisa milawu ya le matikweni yo hambanahambana yo tenga nandzu hi ndlela leyinene. Xiboho xa Ntlawa wolowo a xi nga kombeteli ntsena eka ku khotsiwa ka vavasati lava swa xinkarhana; xigwevo xin’wana ni xin’wana lexi a xi ta humesiwa hikwalaho ka mintirho ya vona ya vukhongeri a xi ta va xi nga fanelanga naswona a xi ta kombisa xihlawuhlawu.

Azerbaijan ri xi be hi makatla xikombelo xo sungula xa Komiti ya Timfanelo ta Vanhu ya Nhlangano wa Matiko xo ntshunxa Irina. Xiyimo xakwe xa rihanyo a xi nga n’wi pfumeleli leswaku a ya tenga hi January 7, 2016. Loko nkarhi wa leswaku a ya tenga wu fika, xana Muavanyisi Akram Gahramanov a a ta seketela nawu wa le matikweni yo hambanahambana?