Eka kheyisi leyi tengiweke hi vandlha ra Timbhoni ta Yehovha ra le Highwood (komiti ya vuavanyisi) v. Wall, hi May 31, 2018, Huvo Leyi Tlakukeke ya le Canada yi endle xiboho xa leswaku, “mintlawa hinkwayo ya vukhongeri yi ntshunxekile ku tivekela milawu,” hikwalaho ku tekiwe xiboho xa leswaku mhaka ya ku susiwa evandlheni a yi fanelanga yi tengiwa ekhoto.

Khoto yi vule leswaku nawu lowu vekiweke hi Timbhoni wa ku susa munhu la endleke xidyoho lexikulu, “a hi wa tihanyi kambe wu endleriwe ku pfuna mudyohi leswaku a tlhela a va xirho xa vandlha,” naswona yi gimete hi ku vula leswaku khoto a yi nge nghenisi nhompfu emhakeni leyi, leyi yi nga xihundla.

Muavanyisi wa Huvo Leyi Tlakukeke Malcolm Rowe u hlamusele xivangelo xo va phanele ya vaavanyisi va kaye va teke xiboho lexi: “milawu leyi vekiweke hi mintlawa yin’wana ya vukhongeri yi nga ha katsa tidyondzo leti tsariweke ehansi leti swirho swa vukhongeri byebyo swi faneleke swi hanya ha tona, ku fana na leyi. Khoto a yi na matimba yo endla swiboho etimhakeni to tano.”

Philip Brumley gqweta ra Timbhoni ta Yehovha, u te: “Huvo Leyi Tlakukeke Ya Le Canada yi landzele xiboho lexi tekiweke, hi huvo leyi tlakukeke ya le Argentina, Brazil, Hungary, Ireland, Italy, Peru, Poland, ni United States emhakeni ya leswaku hi ni mfanelo ya le nawini yo landzela leswi Matsalwa ma swi vulaka mayelana ni leswaku i munhu wa njhani la fanelekaka ku va un’wana wa Timbhoni ta Yehovha.”—1 Vakorinto 5:11; 2 Yohane 9-11.