Ku sukela hi December 2017, nyimpi leyi nga va kona eHema ni le Lendu, exifundzheni xa Ituri, eCongo, yi endle leswaku ku fa vanhu vo tala naswona vanhu va magidi va balekele ematikweni man’wana. Madzolonga lawa ma makhumbe vamakwerhu vo tala tanihi leswi ma ya ka manyanya.

Vanhu va magidi lava humaka eCongolese va balekele eUganda hi ku chava nyimpi leyi, ku katsa ni vahuweleri va 192 lava tshamaka etikampeni timbirhi ta vahlapfa leti nga ekusuhi ni bodara ya Congo. Hi June 2018, Timbhoni ta 1 098 ti balekile laha a ku ri ni nyimpi ti ya eBunia, ku nga ntsindza wa xifundzha xa Ituri. Khombo ra kona, mpatswa wun’wana ni vana vanharhu lava vatswari va vona va khuvuriweke, va lovile hikwalaho ka swiphiqo swa rihanyo. Kambe, a nga kona makwerhu la dlayiweke eka nyimpi yoleyo.

Makaya ya vamakwerhu lava balekeke ya hisiwile. Ku engetela kwalaho, masimu lama vamakwerhu a va rima eka wona ma onhiwile.

Ku sukela siku leri nyimpi yi sunguleke ha rona, vahuweleri lava a va tshama ekule ni laha nyimpi leyi a yi ri kona, va pfune vamakwerhu lava khumbekeke. Van’wana va nyikele hi timovha ta vona leswaku ku yisiwa vamakwerhu endhawini leyi hlayisekeke (vona xifaniso). Ku engetela kwalaho, mindyangu ya Timbhoni ya 205 ya le Bunia yi nyikele hi mali, swakudya ni ndhawu yo tlela leswaku va pfuna vamakwerhu lava, hambileswi na vona va ngo va ni swo kota ku tlela va dyile ntsena. Hambileswi ku nga ni tikampa timbirhi letikulu ta vahlapfa eBunia, vahuweleri hinkwavo lava balekeke va tshama emakaya ya Timbhoni.—Swivuriso 17:17.

Komiti ya Rhavi ya le Congo yi endle lunghiselelo leswaku ku va ni Komiti Yo Phalala, leyi pfunaka vamakwerhu hi swilo swa nkoka leswi va swi pfumalaka. Muyimeri wa rhavi u endzele vamakwerhu lava leswaku a va khutaza ni ku tiyisa vuxaka bya vona na Yehovha.

Ku nga khathariseki xiyimo lexi va weleke, vamakwerhu lava balekeleke eBunia swin’we ni le tindhawini tin’wana va yela emahlweni va ya emihlanganweni ni ku byela van’wana mahungu lamanene. Ku sukela hi February ku fika hi April 2018, vamakwerhu va sungule tidyondzo ta Bibele leti tlulaka 270 ekampeni ya vahlapfa.

Onge Yehovha a nga yela emahlweni a nyika vamakwerhu va le Congo ku rhula ka mianakanyo ni ku katekisa vamakwerhu lava endlaka matshalatshala yo pfuna vahuweleri lava weriweke hi mhangu leyi. Hinkwerhu ka hina hi wu langutele hi mahlongati Mfumo wa Xikwembu lowu nga ta hi sirhelela hi laha ku nga heriki ni ku endla leswaku hi “tshama endhawini yo rhula” swin’we ni vanhu va Yehovha hinkwavo.—Esaya 32:17, 18.