Suva, le FIJI—Exikarhi ka December 2012, xidzedze xa Ntlawa wa vumune xi hlasele xihlala xa Fiji ni xa Samoa. Xidzedze xa Evan lexi hlamuseriwaka tanihi xin’wana xa swidzedze swa matimba swinene leswi tshameke swi hlasela xihlala xa Fiji emalembeni ya 70 lama hundzeke, xi onhe ngopfu lerova vanhu va magidi va boheke ku suka emakaya ya vona. Muhaxi un’wana wa mahungu u fanise ku onhaka loku xi ku vangeke eSamoa ni loku vangiweke hi tsunami leyi veke kona hi 2009.

Timbhoni ta Yehovha ti vike leswaku ku hava Mbhoni ni yin’we leyi feke kumbe leyi vavisekeke. Hambiswiritano, xidzedze lexi xi onhe tiyindlu to tala ta Timbhoni. Nkambisiso wo sungula lowu endliweke le Fiji, wu kombise leswaku makaya ya Timbhoni yo tlula 80 ma onhakile. Exihlaleni xa Upolu le Samoa, Timbhoni ta 47 ti boheke ku suka emakaya ya tona hikwalaho ka xidzedze.

Vanhu lava sukeke emakaya ya vona eSamoa va rhurheriwe swa xinkarhana emiakweni ya kwalaho ya vugandzeri leyi tirhisiwaka hi Timbhoni ta Yehovha swin’we ni le makaya ya mindyangu yin’wana ya Timbhoni. Mphalalo wun’wana eSamoa wu hleriwe hi rhavi ra Timbhoni ta Yehovha ra le Australia. Hi December 18, swakudya ni switirhisiwa swin’wana swi rhumeriwe emavandlheni ya kwalaho ya mune naswona hofisi ya vuhundzuluxeri ya Timbhoni ta Yehovha a yi tirhisiwa tanihi ndhawu leyi ku kumiwaka kona mati yo tenga. Nakambe ntlawa wa Timbhoni wu tikarhatele ku lunghisa tiyindlu leti onhakeke ni ku basisa makaya lawa a ma tele hi mati ni ndzhope. Swilaveko swa xihatla swa lava hlaseriweke hi xidzedze le Fiji, a swi khathaleriwa hi tikomiti ta mphalalo leti vumbiweke hi vatirhi va ku tirhandzela lava nga Timbhoni. Sweswi tikomiti teto ti khathalela swilaveko swa Timbhoni-kulobye leti swibyariwa swa tona swi onhiweke hi xidzedze.

Tevita Sadole, muvulavuleri wa Timbhoni ta Yehovha eFiji, u te: “Hi ni ntirho wo tala lowu hi faneleke hi wu endla endzhaku ka xidzedze lexi kambe hi tiyimiserile. Hi swi langutele hi mahlo-ngati ku pfuna Timbhoni-kulobye ni vaakelani va hina emasikwini lama taka.”

Media Contacts:

International: J. R. Brown, Office of Public Information, tel. +1 718 560 5000

Australia: Donald MacLean, tel. +61 2 9829 5600

Fiji: Tevita Sadole, tel. +679 330 4766

Afrika-Dzonga: Mzamo Goloda, +27 11-761-1000