Timpfula ta matimba eKerala le India, ti khukhule miako yo tala ti tlhela ti dlaya vanhu va 75. Hi ku ya hi ndzawulo ya ta vavhumbhi ta maxelo eIndia matimu ma kombisa leswaku timpfula ta matimba ti huma edzongavupeladyambu.

Hi tshoveke timbilu loko hi twa xiviko lexi humaka erhavini ra le India xa leswaku mpfula leyi ya matimba yi khukhule vatekani va Timbhoni lava nga emalembeni ya va 60 yi tlhela yi dlaya swichudeni swa Bibel kasi vamakwerhu van’wana va vavise ngopfu naswona va le xibedlhele. Ku engetela kwalaho, makwerhu un’wana malembe ya 17 u nwerile loko a ri karhi a ringeta ku pfuna muakelani wa yena.

Ku vumbiwe komiti yo phalala (DRC) leswaku yi kambisisa leswi onhakeke ku pfuna vamakwerhu lava lahlekeriweke ni ku pfuxeta miako. Tiholo tin’wana ti hlawuriwe leswaku ti tirha ku khathalela mitirho yoleyo ya ku phalala. Swiviko swi kombisa leswaku tiyindlu ta vamakwerhu va kwalomu ka 46 ti onhakile. Mindyangu ya kwalomu ka 85 kumbe (vahuweleri 475) va kombeleriwe ndhawu yo tshama eka vamakwerhu kumbe maxaka ya vona. Ku vikiwa leswaku Tiholo tin’wana ta Mfumo a ti rhendzeriwe hi mati/ endzeni ka mati. Komiti yo phalala a yi tshamela ku hi nyika swilemukiso malunghana ni timpfula ta matimba leti a ti languteriwile.

Vamakwerhu lava humaka erhavini swin’we ni valanguteri va muganga ni vakulu va mavandlha, va endzele vamakwerhu volavo leswaku va va nyika nchavelelo lowu humaka eMatsalweni ni swikhutazo.

Hi fanele hi tsundzuka ni ku khongelela vamakwerhu hinkwavo lava weriweke hi swiyimo leswi swo tika. Hi wu langutele hi mahlongahati nkarhi lowu timhangu ta ntumbuluko ti nga ta va ti nga ha ri kona ni switlhavi.—Nhlavutelo 21:3, 4.