Xidzedze lexikulu lexi vuriwaka Trami lexi welaka eka ntlawa wo sungula, xi hlasele edzongeni wa Japani hi Sonto ni vusiku, hi September 30, 2018, a xi ri ni moya wa matimba ni mpfula ya matimba. Xidzedze xi ye xi hela matimba loko xi ri karhi xi ya en’walungwini hi mahelovhiki, laha xi heteleleke xi fika eTokyo hi Musumbhunuku, October 1. Ku fe vanhu vanharhu, ku vaviseka vanhu va kwalomu ka 200, kasi makaya yo tlula 1,3 miliyoni ma sale ma nga ri na gezi.

Hi ku ya hi xiviko lexi humaka eka valanguteri va miganga, xihlala xa Okinawa, lexi nga edzongeni wa Japani, hi xona lexi onhakeke ngopfu. Xiviko xo sungula lexi humaka eka miganga yinharhu ya le Okinawa ni le tindhawini leti yi rhendzeleke xi boxe leswaku a nga kona makwerhu loyi a feke kambe ku vaviseke vamakwerhu va kaye. Xidzedze lexi xi tlhele xi onha tindlu ta kwalomu ka 120 ta vamakwerhu ni Tiholo ta Mfumo ta ntlhanu. Tiholo tin’wana ta Mfumo ta 41 ti onhakile loko xidzedze xi hundza hi le swifundzheni swin’wana swa Japani.

Valanguteri va miganga va kwalaho ni swirho swa Ndzawulo yo Pulana ni ku Aka va ya emahlweni va ri karhi va lavisisa leswaku xidzedze xi onhe ku fikela kwihi kutani va hlela ndlela leyi va nga va pfunaka ha yona vamakwerhu hi swilo leswi va swi lavaka ni hi xikhutazo lexi humaka eBibeleni.

Hi hambeta hi khongelela vagandzerikulorhi lava hlaseriweke hi xidzedze lexi ni timhangu tin’wana ta ntumbuluko leti ta ha ku hlaselaka eJapani. Ha tshemba leswaku Tata wa hina wa le tilweni u ta hambeta a chavelela vamakwerhu a va tiyisa.—2 Vatesalonika 2:17.