SELTERS, eJarimani—Hi February 22, 2013, Mathilde Hartl la nga Mbhoni ya Yehovha u nyikiwe sagwadi hi Horst Seehofer, Holobye-nkulu wa le Bavaria. Sagwadi leri ri hlawulekile swinene eRiphabliki ra Tiko ra Jarimani naswona ri nyikiwa munhu hikwalaho ka mintirho leyinene leyi a yi endleke etikweni.

Manana Hartl, loyi a tshamaka eBavaria u fundzhiwile hikwalaho ka nkhathalelo lowu a wu nyikaka Martin n’wana wakwe loyi a lamaleke, loyi sweswi a nga ni malembe ya 26. Loko a ha ri n’wana u hlaseriwe hi vuvabyi lebyi tsanisaka misiha lebyi vuriwaka Duchenne muscular dystrophy (DMD). Manana Hartl u pfuka nivusiku leswaku a n’wi khathalela, leswi katsaka ku va a n’wi langutisa leswaku u hefemula kahle ni ku tiyisekisa leswaku fambiselo ra ku hefemula ri kahle leswaku a papalata ku vanga mavabyi man’wana kumbe pneumonia. Max n’wana wakwe un’wana, na yena u khomiwe hi vuvabyi lebyi fanaka ku katsa ni bya miehleketo. Manana Hartl u khathalele vana vakwe havambirhi hi rirhandzu ku ringana malembe yo tala. Lexi twisaka ku vava, Max u lovile hi 2008 a ri ni malembe ya 19.

Loko a vutisiwa leswaku u ma kuma kwihi matimba ya ku kombisa nkhathalelo wo tano, u te: “Eka vupfumeri bya mina. Leswi ndzi nga Mbhoni ya Yehovha, ndza byi xixima swinene vutomi. Ndzi lava ku endla hilaha ndzi nga kotaka ha kona leswaku n’wana wa mina a tshama a tsakile evuton’wini byakwe ku nga khathariseki ku lamala kakwe.”

Holobye-nkulu Seehofer u ndhundhuzele manana Hartl swin’we ni lava a fundzhiweke na vona, a ku: “Mi endle misava leswaku yi va ndhawu yo antswa.”

Media Contacts:

International: J. R. Brown, Office of Public Information, tel. +1 718 560 5000

Germany: Wolfram Slupina, tel. +49 6483 41 3110

Afrika-Dzonga: Mzamo Goloda, +27 11-761-1000