JANUARY 27, 2015
KAZAKHSTAN
Timbhoni Ti Humesa Bibele Ya Xikazakh eNhlengeletanweni Ni Ku Endla Nkombiso Wa Yona
Gerrit Lösch xirho xa Huvo leyi Fumaka ya Timbhoni ta Yehovha a a ri karhi a humesa Vuhundzuluxeri Bya Misava Leyintshwa Bya Matsalwa Yo Kwetsima hi Xikazakh.
ALMATY, eKazakhstan—Timbhoni ta Yehovha ti humese Bibele ya Vuhundzuluxeri Bya Misava Leyintshwa Bya Matsalwa Yo Kwetsima ya Xikazakh enhlengeletanweni, leyi a yi ri hi September 26-28, 2014. Vanhu lava a va ri kona va 3 721 va kume Bibele leyi leyintshwa.
Nkulukumba Alexander Garkavets, la nga ni ntokoto wa ntivo-tindzimi, u vule leswi hi Vuhundzuluxeri Bya Misava Leyintshwa bya Xikazakh: “Ku nga khathariseki ku kayivela ka switirhisiwa swa ku hundzuluxela rungula ro kwetsima ri ya eka Xikazakh, vahundzuluxeri lava nga Timbhoni va endle ntirho wa kahle swinene. Ndlela leyi va hundzuluxeleke rungula ri ya eka Xikazakh ya tsakisa swinene. Vuhundzuluxeri Bya Misava Leyintshwa byi hundzuluxeriwe hi ririmi ra manguva lawa naswona bya twisiseka.”
Ndhawu ya Nkombiso: Timbhoni ti veke matafula lama nga ni swakudya lama khavisiweke hi swa ndhavuko.
Endzhaku ka vhiki ku hundze nhlengeletano, hi October 3, rhavi ra Timbhoni ta Yehovha eKazakhstan ri endle nkombiso wa Bibele ya Xikazakh. Xitichi xa Xiya-ni-moya xa Azattyq xa le Kazakhstan xi vike hi nkombiso lowu: “Ndhawu leyi a yi endzeriwe hi vatirhelamfumo va Akimat (state regional administration) va doroba ra Almaty, va ri ni Nkulukumba Nurzhan Zhaparkul wa Ndzawulo ya Timhaka ta Vukhongeri, vayimeri va matiko man’wana, vativi va tidyondzo ta vukhongeri ni van’wana.” Nkulukumba Zhaparkul u te: “Timbhoni ta Yehovha ti hi amukele hi mandla mambirhi endhawini ya tona eAlmaty. Ntirho lowu wa tlangeriwa swinene naswona wu hi pfuna ngopfu eka ntirho wa hina.”
Nurzhan Zhaparkul (la nga exikarhi), murhangeri wa Ndzawulo ya Timhaka ta Vukhongeri ni vatirhelamfumo van’wana va Komiti ya Timhaka ta Vukhongeri va ri karhi va valanga erhavini ra Timbhoni ta Yehovha hi nkarhi wa nkombiso.
Swirhambo swa nkombiso leswi a swi tirhisiwa eAlmaty.
Polat Bekzhan, muvulavuleri wa Timbhoni ta Yehovha eKazakhstan u te: “A hi tsake swinene ku vona vanhu lava a hi va rhambile enhlengeletanweni ya hina ni ndlela leyi va yi tsakeleke ha yona Bibele ya Xikazakh. Xikongomelo xa hina xa ku hlela nkombiso lowu xi hetisekile hi ku rhamba vatirhelamfumo, swihaxamahungu ni vaakelani va hina leswaku va ta tiva Timbhoni ta Yehovha ku antswa.”
Media Contact(s):
International: J. R. Brown, Office of Public Information, tel. +1 718 560 5000
Kazakhstan: Polat Bekzhan, tel. +7 727 232 36 62
Afrika-Dzonga: Mzamo Goloda, +27 11-761-1000
U Nga Ha Tsakela
NTIRHO WO KANDZIYISA
Ku Kandziyisiwa Ka Tibibele Hi Ririmi Ra Vona
Vuhundzuluxeri Bya Misava Leyintshwa Bya Matsalwa Yo Kwetsima byi nyikiwa un’wana ni un’wana mahala loyi a lavaka ku byi hlaya.