EDOROBENI RA MEXICO—Timbhoni ta Yehovha a ti ri tin’wana leti hlanganyeleke swin’we ni vakandziyisi va tibuku va 150 eka Nkombiso wa Minkandziyiso, lowu a wu hleriwe hi Huvo ya le Mexico yo Kandziyisa Tibuku eMexico (National Chamber for the Mexican Publishing Industry [CANIEM ]). Nkombiso wolowo, lowu khomeriweke eWorld Trade Center ya le Dorobeni ra Mexico ku sukela hi April 25 ku ya fika hi May 4, 2014, a wu fungha lembe ra vu-50 ra CANIEM. Vanhu va kwalomu ka 20 000 a va ri eka xiendlakalo lexi.

Timbhoni a ti kombisa minkandziyiso ya tona leyi sekeriweke eBibeleni yo tanihi tibuku, timagazini swin’we ni tivhidiyo. Ti tlhele ti navetisa website ya tona leyi nga nawini ya www.pr418.com, laha minkandziyiso leyi kopekaka hi tindlela to hambana-hambana yi kumekaka hi tindzimi to tlula 650. Vaendzi va ti tekele minkandziyiso yo tlula 1 600 naswona van’wana va kombele ku endzeriwa emakaya ya vona. Tanihi leswi ku nga ntolovelo wa Timbhoni ta Yehovha, ku endliwe malunghiselelo yo nyika vanhu minkandziyiso swin’we ni ku fambisa dyondzo ya Bibele ya le kaya ya mahala eka lava va yi kombeleke.

Gamaliel Camarillo, muvulavuleri wa Timbhoni ta Yehovha le Mexico u ri: “Hi tsake ngopfu ku vona vanhu vo tala va ta endhawini leyi a hi ri eka yona va ta vona minkandziyiso ya hina, va tsakela Bibele swin’we ni website ya hina ya jw.org. Hi swi teka ku ri mhaka ya nkoka ku pfuna vanhu lava khomekeke leswaku va kota ku kuma minkandziyiso ya hina mahala. Kutani ku hlanganyela ka hina eka nkombiso lowu, swi hi vuyerisile swinene.”

Media Contact(s):

International: J. R. Brown, Office of Public Information, tel. +1 718 560 5000

Mexico: Gamaliel Camarillo, tel. +52 555 133 3048

Afrika-Dzonga: Mzamo Goloda, +27 11-761-1000