EDOROBENI RA MEXICO—Hi June 7, 2014, vatirhelamfumo va bumabumele Timbhoni ta Yehovha to tlula 250 leti pfuneteke hi ku tirhandzela ku basisa ndhawu ya mintlango ya Baldomero “Melo” Almada, laha a ku ta khomeriwa xiendlakalo xo hlawuleka.

Profesa Antonio Cota Márquez, mukongomisi wa Nhlangano wa Mintlango ya Masipala eHuatabampo, le Mexico, u hete tin’hweti to hlayanyana a a ri karhi a lava vanhu va ku pfuneta hi ku tirhandzela leswaku va basisa xitediyamu lexi holobye a nga ta nyiketela ximfumo ndhawu leyintshwa yo tsutsumela eka yona hi July 7, 2014. Timbhoni ta Yehovha ti xi amukerile xikombelo xa mukongomisi naswona ti tirhe swin’we ni vatirhi vo basisa va xitediyamu, ku lunghisa rivala ni ku pfuxeta pende ya tibodo ta basketbolo.

Mukongomisi Cota u kombele Timbhoni tanihi leswi a tivaka ndlela leyi ti yi khathalelaka ha yona holo leyi nga exitediyamu leyi ti yi tirhisaka nkarhi ni nkarhi ku khoma minhlangano ya mahala leyi sekeriweke eBibeleni hi Xipaniya na Ximayo. Endzhaku ko xiya ndlela leyi Timbhoni ti yi basiseke ti tlhela ti yi lunghisa ha yona ndhawu ya mintlango, Mukongomisi Cota u vule leswi: “Ndza tsaka ku vona vanhu lava tinyiketeleke ku basisa ndhawu ya hina ya mintlango.” U tlhele a ku: “Meyara wa hina Ramón Díaz Nieblas, u tlangela ntirho lowu mi nga wu endla namuntlha. Hi ta ya emahlweni hi pfumelela nhlengeletano ya n’wina ku tirhisa ndhawu leyi. Ha wu khensa swinene ntirhisano wa n’wina.”

Media Contact(s):

International: J. R. Brown, Office of Public Information, tel. +1 718 560 5000

Mexico: Gamaliel Camarillo, tel. + 52 555 133 3000

Afrika-Dzonga: Mzamo Goloda, +27 11-761-1000