Ku thwasa ka tlilasi ya vu 148 ya Giliyadi a ku hambananga helo ni titlilasi ta Giliyadi leti nga hundza kambe ko va ni nchumu wun’we wo hlawuleka hi tlilasi leyi: a ku nga ri na vanhu lava a va hlalela va ri eholweni. Lava nga rhambiwa a va wu hlalela eka Internet. Hikwalaho ka xikanyana lexi khumbaka misava hinkwayo nongonoko lowu wu ve xikombiso xa leswaku nhlangano wu fambisana ni swiyimo.

Nongonoko lowu a wu khomiwe hi March 14, 2020, entsindza wa dyondzo wa Timbhoni ta Yehovha ePatterson, le New York. Makwerhu Stephen Lett, xirho xa Huvo Leyi Fumaka a ku ri mutshamaxitulu eka nongonoko wolowo. Ku thwase swichudeni swo ringana 55. *

Mavhiki ma nga ri mangani ku nga si khomiwa nongonoko lowu, se a ku ri phulaniphulani eka mahungu ku vulavuriwa hi xikanyana lexi xa COVID-19. Hilaha swi kombisiweke ha kona eka xiyenge xa Mahungu eka jw.org, vamakwerhu entsindza wa misava hinkwayo wa Timbhoni ta Yehovha a va ri karhi va landzelerisisa mhaka leyi naswona va nyika mavandlha nkongomiso hi ku landza swileriso swa gavhamente.

Swileriso swin’wana i swa ku hunguta ku hlengeletana ka vanhu. Hi ku landza nkongomiso lowu Huvo Leyi Fumaka yi hlele leswaku ku nga vi na vanhu lava nga ta hlalela nongonoko lowu va ri eholweni. Ndyangu wa Bethele ni swichudeni swa Giliyadi swi ve xikombiso lexinene eku landzeleni ka nkongomiso lowu.—Yh 13:34, 35.

Nilokoswiritano, ku ve ni lunghiselelo lava nga rhambiwa va swi kota ku hlalela nongonoko lowu hi ku tirhisa Internet. Lunghiselelo leri ri pfune vamakwerhu vo ringana 10 000 emisaveni hinkwayo ku katsa ni swirho swa ndyangu ni vanghana va swichudeni leswaku va hlalela nongonoko lowu.

Huvo Leyi Fumaka yi tsakela leswaku tinhlengeletano ta hina ta vugandzeri ti ya emahlweni ku nga khathariseki ntungu wa COVID-19. Hikwalaho ka sweswo Huvo leyi Fumaka yi nyike marhavi nkongomiso wa ndlela leyi tinhlengeletano ta vandlha ti nga khomiwaka ha yona. Eka swiyimo swin’wana vahuweleri va nga ha hlangana hi mitlawa va tirhisa switirhisiwa swa thekinoloji leswaku va khoma tidyondzo. Ha tiyiseka leswaku vamakwerhu emisaveni hinkwayo a va nge hupiwi hi tidyondzo leti vuyerisaka leti nhlangano wa Yehovha wu hi nyikaka tona.

Swi le rivaleni leswaku a ku na nchumu lexi nga sivelaka matimba ya Yehovha leswaku ma hi pfuna hi kota ku hlula swihinga leswi.—Ps 18:29.