NEW YORK—Ntirho wo phalala wa ha famba kahle endzhaku ka loko Xidzedze xa Irma na xa Maria swi onhenetele masimu ya rhavi ra le Kharibiya ni le tindhawini ta le kusuhi hi September 2017. Swiviko leswi landzelaka leswi humaka eka rhavi ra le Barbados, ra le Cuba, ra le Dominican Republic, France ni le United States swi hi nyika vuxokoxoko mayela ni mpfuno lowu vamakwerhu va nga le ku wu nyikeleni.

Ku hleriwe tikomiti tinharhu ta mphalalo (DRC), ku katsa ni yin’we leyi hlanganisiweke na rhavi ra le France, ti tirhe swin’we ku vumba mintlawa ya vamakwerhu lava nga ta khathalela swilaveko swa xihatla swa vahuweleri lava hlaseriweke hi swidzedze. Ntirho lowu hleriweke wo pfuxeta emasin’wini ya rhavi ra Barbados wu ta koxa tidolara ta kwalomu ka 2,4 wa timiloyini naswona wu ta katsa ku pfuxeta Tiholo ta Mfumo ta nhungu ni makaya ya vamakwerhu ya 122. Makaya man’wana ya 19 ma fanele ma tlhela ma akiwa hi vuntshwa.

Rhavi ri vike leswaku vahuweleri lava hlaseriweke hi Xidzedze xa Irma va le ku nyikiweni ka mpfuno lowu lavekaka. Leswi swi katsa ku endzeriwa va ta chaveleriwa hi vayemeri va rhavi.

Tikomiti tinharhu ta DRC ta mphalalo ti hlele ntirho wo phalala vahuweleri va 57 lava hlaseriweke hi mhangu. Vamakwerhu va kwalaho va nyikele hi swakudya, mati, swiambalo ni swilaveko swin’wana. Loko n’hweti ya October yi hela, makaya hinkwawo lama onhakeke a ma basisiwile ni ku lunghisiwa, ntirho lowu wu endliwe ngopfu hi vatirhi va ku tirhandzela va kwalaho.

Rhavi ri vumbe DRC exihlaleni xa St. Martin, swin’we ni ntsindza wa mphalalo wa xifundzha exihlaleni xa Guadeloupe, leswaku yi langutela ntirho wo aka wa mphalalo, lowu ku ringanyetiwaka leswaku wu ta durha tidolara ta 1,4 wa timiliyoni. Ntirho wa kona wu katsa ku lunghisiwa ka Tiholo ta Mfumo ta 12 ta le Guadeloupe, Tiholo ta Mfumo timbirhi ni makaya ya 24 ya vamakwerhu lava tshamaka eSt. Martin. Vatirhi va ku tirhandzela va 22 lava va humaka eFrance, Guadeloupe ni le Martinique, a va ta ta va ta pfuneta eka ntirho wo phalala.

Vahuweleri vo tlula 13 000 lava tshamaka ensin’wini ya rhavi va khumbekile. Sweswinyana, ti-DRC ta mune ti le ku pfuneni ka vamakwerhu naswona se ti hete xiphemu xo sungula xa ntirho wo phalala, lowu katsaka ku pfuxeta miako leyi onhakeke ya vamakwerhu leyi endlaka tiphesent to tlula 95 ni ku hangalasa swilo swin’wana leswi lavekaka swo tanihi swakudya ni mati. Ntirho wo sungula wa mphalalo wa ha ya emahlweni ePuerto Rico ni le Swihlaleni swa British na U.S. Virgin.

Nhlayo hinkwayo ya vatirhi va ku tirhandzela a yi ri 690, va 450 a va huma eswihlaleni kasi va 240 a va huma eFlorida ni le Georgia, va tile va ta pfuneta ku lunghisa Tiholo ta Mfumo ni makaya ya vamakwerhu. Ku ringanyetiwa leswaku ntirho wo phalala wu ta durha kwalomu ka tidolara ta 30 wa timiliyoni naswona wu katsa ntirho wo lunghisa miako etindhawini leti landzelaka:

• British na le Swihlaleni swa U.S. Virgin – Tiholo ta Mfumo ta ntlhanu, makaya ya 190

• Florida – Tiholo ta Mfumo ta 40 ni makaya ya 1 174

• Puerto Rico –Tiholo ta Mfumo ta 106, Tiholo timbirhi ta Tinhlengeletano ni makaya ya 1 216

• Turks na le Caicos – Tiholo timbirhi ta Mfumo ni makaya ya 56

Hi khongelela leswaku Yehovha a tiyisa mavoko ya hinkwavo lava nga eku pfuneteni eka ntirho lowu wo phalala. Ha tshemba leswaku ntirho wo phalala swin’we, ni nchavelelo lowu humaka eBibeleni, swi ta pfuna vamakwerhu leswaku va hlakarhela ni ku ya emahlweni va tirhela Yehovha Xikwembu xa hina hi vun’we.—Nehemiya 2:18.

Va Mahungu:

Emisaveni Hinkwayo: David A. Semonian, Office of Public Information, +1-845-524-3000

Barbados: John Medford, +1-246-438-0655

Dominican Republic: Josué Féliz, +1-809-595-4007

France: Guy Canonici, +33-2-32-25-55-55