ENEW YORK—Timbhoni ta Yehovha ti humese Bibele leyi pfuxetiweke ya marito lamakulu ya Bibele—Matsalwa Yo Kwetsima Ya Misava leyintshwa tanihi matshalatshala ya tona yo endla leswaku vanhu vo tala va yi kuma hi ku olova. Ti hlele leswaku ku printiwa tikopi ta 424 000 ta Bibele leyi eUnited States ni le Japani.

Timbhoni ti humese nkandziyiso lowu tolovelekeke wa Bibele leyi pfuxetiweke ya Bibele—Matsalwa Yo Kwetsima Ya Misava leyintshwa eka nhlengeletano yo hlawuleka leyi haxiweke hi October 5-6, 2013, ematikweni ya 31. Nkandziyiso lowu pfuxetiweke wa 2013 wu antswisiwe swinene ku sukela eka nkandziyiso wa 1984. Hi October 7, 2013, Timbhoni ti hoxe Bibele leyi eka app leyi vuriwaka JW Library, naswona se yi kopiweke kwalomu ka 1,4 wa timiliyoni. Nkandziyiso lowu pfuxetiweke wa Bibele—Matsalwa Yo Kwetsima Ya Misava leyintshwa wa kumeka nakambe hi swivumbeko swo tala swa elektroniki eka www.pr418.com.

Swivumbeko hinkwaswo swa nkandziyiso lowu pfuxetiweke wa Bibele—Matsalwa Yo Kwetsima Ya Misava leyintshwa swi ni swikombo swa kwalomu ka 60 000, leswi pfunaka vahlayi ku wu twisisa kahle mongo wa timhaka ta Bibele. Nakambe ku katsiwe tidayagramu, mimepe ya matiko ya le minkarhini ya Bibele ni tichati ta mivalavala leti hlamuselaka vuxokoxoko bya vutomi bya siku ni siku bya le minkarhini ya ku tsariwa ka Bibele. Xiengetelo xi hlamusela timhaka to tanihi milawu ya ku hundzuluxela Bibele ni matimu ya ndlela leyi Bibele yi tsariweke ni ku hlayisiwa ha yona.

Nkandziyiso wa 1984 wa Bibele—Matsalwa Yo Kwetsima Ya Misava leyintshwa ana se a wu ri na rona vito ra Xikwembu leri humelelaka kwalomu ka 7 000. Hambiswiritano, nkandziyiso lowu pfuxetiweke wa 2013 wu tlhela wu komba ndzavisiso wa sweswinyana wa tindhawu leti vito ra Xikwembu ri humelelaka eka tona eka matsalwa ya khale ya Bibele. Hi ku ya hi nkambisiso wun’wana wa Tibuku-nsongwa ta le Lwandle leri Feke swin’we ni matsalwa man’wana ya khale, nkandziyiso lowu pfuxetiweke wa Bibele—Matsalwa Yo Kwetsima Ya Misava leyintshwa wu ni tindhawu tin’wana ta tsevu laha vito ra Xikwembu ri kumekaka kona, ku nga Vaavanyisi 19:18; 1 Samuwele 2:25; 6:3; 10:26; 23:14; 23:16. Xiengetelo xi tlhela xi vulavula hi ndlela leyi vito ra Xikwembu a ri tirhisiwa ha yona eka ririmi ra khale ra Xiheveru ni ra Xigriki swin’we ni ku humelela ka rona eka Tibibele to hlayanyana ta namuntlha.

I khale Timbhoni ti ri karhi ti printa, ti fambisela vanhu ni ku hundzuluxela bibele ya Matsalwa Yo Kwetsima Ya Misava leyintshwa, leyi vativi va yi xiximaka swinene hikwalaho ka ku pakanisa ka yona. Bibele leyi heleleke ya vuhundzuluxeri lebyi yi humesiwe ro sungula hi Xinghezi hi 1961. Hi 1963, phepha-hungu ra The New York Times ri vike leswaku Vuhundzuluxeri Bya Misava Leyintshwa byi ta kumeka hi tindzimi tin’wana ta tsevu hilaha swi tivisiweke hakona eka ntsombano wa Timbhoni lowu a ti wu khomele eXitediyamu xa Yankee. Ku sukela kwalaho, Timbhoni ti humese vuhundzuluxeri lebyi hi tindzimi leti tlulaka 120. Emalembeni ya sweswinyana, Komiti ya Vuhundzuluxeri bya Bibele bya Misava Leyintshwa yi hlawule ku pfuxeta Vuhundzuluxeri Bya Misava Leyintshwa leswaku byi fambisana ni ririmi ra manguva lawa swin’we ni ku hlamusela swiga swin’wana swa Bibele, ku endlela leswaku byi hlayeka hi ku olova naswona byi twisiseka. Bibele—Matsalwa Yo Kwetsima Ya Misava leyintshwa leyi pfuxetiweke yi ni mindzulamiso yoleyo ya sweswinyana ya ku hundzuluxela Bibele.

J. R. Brown, muvulavuleri wa Timbhoni ta Yehovha entsindza wa tona wa misava hinkwayo, u te: “A swi tsakisa ku kuma minkandziyiso yo sungula ya Vuhundzuluxeri Bya Misava Leyintshwa emalembeni yo tlula 50 lama hundzeke naswona swi tsakisa ngopfu ku va ni nkandziyiso lowuntshwa lowu pfuxetiweke. Xikongomelo xa hina hileswaku Matsalwa yo Kwetsima ma twisisiwa hi vanhu hinkwavo, hi ku tirhisa ririmi leri pakanisaka, leri xiximekaka ni leri vulavuriwaka namuntlha.”

Media Contact(s):

International: J. R. Brown, Office of Public Information, tel. +1 718 560 5000

Afrika-Dzonga: Mzamo Goloda, +27 11-761-1000