ENEW YORK—Loko ku tlhekeka ka Ebola leyi dlayaka ku hlakata Vupela-dyambu bya Afrika, Timbhoni ta Yehovha ti ya emahlweni ti dyondzisa swirho swa tona hi vuvabyi lebyi.

Loko ku twiwe leswaku ku kumiwe xitsongwatsongwana xa Ebola etikweni ra Guinea nileswaku hi ku hatlisa xi nghene ematikweni lama akelaneke na rona, ku nga Liberia na Sierra Leone, marhavi ya Timbhoni ta Yehovha ematikweni wolawo ma rhumele mapapila hi ku hatlisa leswaku ma lemukisa mavandlha hinkwawo ematikweni wolawo manharhu. Mapapila wolawo ma tirhise swiletelo ni swiringanyeto leswi nyikeriweke hi minhlangano ya kwalaho ya mfumo leswaku ma hlamusela makhombo ya xitsongwatsongwana lexi, ndlela leyi xi tlulelaka vanhu ha yona swin’we ni magoza yo tisirhelela lama faneleke ma tekiwa yo sivela vuvabyi lebyi leswaku byi nga hangalaki. Collin Attick, muvulavuleri wa Timbhoni ta Yehovha eSierra Leone, u te: “Vanhu vo tala a va pfilunganyekile eku sunguleni, va nga tivi leswi va faneleke va swi endla hikuva va tshama etindhawini leti mavabyi ya muxaka lowu ma nga twisisiwiki kahle naswona ku hangalasiwaka mavarivari lama nga riki ntiyiso malunghana ni leswi vangaka Ebola. Kambe loko swirho swa mavandlha ya hina swi twe swiletelo eHolweni ya swona ya Mfumo, swi teke goza leri faneleke hi ku hatlisa.”

Hi July, vayimeri lava famba-fambaka lava nga Timbhoni ta Yehovha va sungule ku teka maendzo yo hlawuleka va endzela vandlha rin’wana ni rin’wana eSierra Leone ni le Guinea va heta masiku mambirhi na rona. Loko va fika a va vulavula ni rona hi nhloko-mhaka leyi nge “Ku Yingisa Swi Ponisa Vutomi,” hi xikongomelo xo ri dyondzisa tindlela to tisirhelela eka vuvabyi lebyi swin’we ni ku ri khutaza leswaku ri hambeta ri tirhisa swiletelo swa sweswinyana leswi nga kona. Maendzo lawa ma ta hambeta ma endliwa ku fikela hi November 2014. Ku engetela kwalaho, Timbhoni ti hlele leswaku ku vekiwa mati yo hlamba mavoko lama cheriweke murhi wo dlaya switsongwatsongwana enyangweni wa miako ya vugandzeri ya Timbhoni (leyi vitaniwaka Tiholo ta Mfumo) eGuinea, eLiberia ni le Sierra Leone. Timbhoni to tala ematikweni wolawo ti landzela xikombiso xexo emakaya ya tona hi ku veka mati yo hlamba mavoko.

Hi ku ya hi xiviko xa Vandla ra Rihanyo ra Misava Hinkwayo lexi tsariweke hi October 1, 2014, ku vikiwa swiendlakalo swa 7 178 naswona vanhu va 3 300 va file eka ku tlhekeka ka sweswinyana ka Ebola eVupela-dyambu bya Afrika, hambileswi ku languteriweke leswaku nhlayo yoleyo yi tlakuka. Hi October 2, eka Timbhoni ta 2 800 leti nga eGuinea ni le Sierra Leone, wansati un’wana loyi a nga Mbhoni tlhelo muongori, u tluleriwe hi xitsongwatsongwana xa Ebola naswona u fe hi September 25, 2014. Eka Timbhoni ta 6 365 leti nga eLiberia, ta khume ti file hikwalaho ka vuvabyi lebyi; ta tsevu a ku ri vatirhi va swa rihanyo. Hambileswi xitsongwatsongwana lexi xi ngheneke ni le Nigeria sweswinyana, ku hava Mbhoni ni yin’we leyi tluleriweke hi vuvabyi lebyi. Ku engetela kwalaho, ku hava varhumiwa lava nga Timbhoni ematikweni lawa lava ku vikiweke leswaku byi va tlulerile. Loko xitsongwatsongwana lexi xi ri karhi xi hangalaka, vo tala va vona a va fambile va teke masiku ya ku wisa kumbe va ye etinhlengeletanweni eYuropa ni le United States. Van’wana va ha ku tlhelela entirhweni wa vona wa vurhumiwa naswona va teka magoza lama faneleke yo tisirhelela ni ku tirhisa swiletelo leswi humaka erhavini ra kwalaho. Varhumiwa van’wana va ha rindzele ku tlhelela hikwalaho ka ku yimisiwa ka swihaha-mpfuka kumbe hikwalaho ka swivangelo swin’wana.

Tikomiti ta mphalalo ta vatirhi va ku tirhandzela lava nga Timbhoni ti le ku pfuneni ka Timbhoni ta kwalaho leswaku ti khathalela swilaveko swa mindyangu ya tona swin’we ni vagandzeri-kulobye ematikweni ya le Vupela-dyambu bya Afrika lama hlaseriweke ngopfu hi Ebola. Thomas Nyain, Sr., muvulavuleri wa Timbhoni ta Yehovha eLiberia, u te: “Ku landzela milawu ya Bibele leyi vulavulaka hi ku basa swin’we ni ku veka vavabyi va ri voxe swa hi pfuna leswaku hi lwisana ni xiyimo lexi. Leswi hi nga Timbhoni ta Yehovha, hi tlhela hi papalata mikhuva yo lahla vafi leyi nga fambisaniki ni Matsalwa. Leswi swi sirhelela swirho swa hina, ngopfu-ngopfu enkarhini lowu wa mangava.”

ESierra Leone, ku humesiwe xitiviso eka xitichi xa kwalaho xa xiya-ni-moya lexi hlamuselaka ndlela leyi Timbhoni ta Yehovha ti pfuneke swirho swo tona swin’we ni vanhu emugangeni lava nga riki Timbhoni leswaku va papalata xitsongwatsongwana xa Ebola. Vatirhela-mfumo va kwalaho va kombele leswaku komiti ya mphalalo ya Timbhoni yi pfuna minhlangano ya mfumo endhawini yoleyo.

J. R. Brown, muyimeri wa Timbhoni entsindza wa tona eNew York, u te: “Swa hi khutaza ku vona vapfumeri-kulorhi eVupela-dyambu bya Afrika va va ni vuxiyaxiya swinene loko va ri karhi va ya emahlweni ni ntirho wa vona wo dyondzisa vanhu Bibele. Vamakwerhu hinkwavo lava langutanaka ni vuyelo bya xitsongwatsongwana xa Ebola hi ehleketa ha vona naswona ha va khongelela.”

Media Contact(s):

International: J. R. Brown, Office of Public Information, tel. +1 718 560 5000

Guinea: Thierry Pourthié, tel. +224 631 40 96 50

Liberia: Thomas Nyain, Sr., tel. +231 886 513 414

Nigeria: Paul Andrew, tel. +234 7080 662 020

Sierra Leone: Collin Attick, tel. +232 77 850 790

Afrika-Dzonga: Mzamo Goloda, +27 11-761-1000