ENEW YORK—Ntsombano wo sungula wa matiko wa Timbhoni ta Yehovha lowu nga ta teka masiku manharhu, lowu nga ni nhloko-mhaka leyi nge “Hambetani Mi Lava Mfumo Wa Xikwembu Ku Sungula!,” wu ta sungula nimixo hi Ravuntlhanu, June 6, 2014, eFord Field eDetroit, Michigan, le USA. Swiyenge swa ntsombano lowu swi ta haxiwa kunene etindhawini tin’wana eArizona, eCalifornia, eFlorida, eIllinois, eMissouri, eNew Jersey ni le North Carolina naswona swi ta tolokiwa hi Xialbaniya, Xikorea, Xipolixi ni Xiputukezi.

J. R. Brown, muvulavuleri wa Timbhoni ta Yehovha entsindza wa tona eBrooklyn, le New York, u te: “Eka mavhiki manharhu yo hetelela, Timbhoni ta le Detroit ni ta le madorobeni lama nga ta hlalela nongonoko lowu hi lunghiselelo ra Internet, a ti ri karhi ti rhamba vaakelani va tona leswaku va va kona eka xiendlakalo lexi. EDetroit, hi langutele vanhu va tinxaka-xaka va kwalomu ka 45 000 ku katsa ni vapfhumba vo tlula 2 000 lava humaka eAustralia, eCanada, eGermany ni le Taiwan.”

Hi nguva ya ximumu, Timbhoni ta le United States ti ta khoma mintsombano ya 16 ya matiko eswitediyamu leswikulu eswifundzheni swa khume. Etindhawini tin’wana nongonoko wu ta nyikeriwa wu helerile kumbe wu nga helelanga hi Xialbania, Xiarabu, Xiarmenia, Xicanton, Xichuukese, Xicreole xa le Haiti, Xifurwa, Xigriki, Xihindi, Xiiloko, Xiindonesia, Xijapani, Xikorea, Ximandarin, Ximarshall, Xintariyana, Xipaniya, Xiperesiya, Xipolixi, Xiromania, Xirhaxiya, Ririmi ra Mavoko ra le Amerika, Xisamoa, Xitagalog, Xitwi ni Xivietnam. Ku sukela hi June 2014 ku fikela hi 2015, Timbhoni ti ta khoma mintsombano ya matiko eAustralia, aEcuador, aEngland, eGermany, eGreece, eMexico, eSouth Korea ni le Zimbabwe.

Media Contact(s):

International: J. R. Brown, Office of Public Information, tel. +1 718 560 5000

Afrika-Dzonga: Mzamo Goloda, +27 11-761-1000