ENEW YORK—Hi August 1, 2014, Timbhoni ta Yehovha ti ta sungula tsima emisaveni hinkwayo leri nga ta teka n’hweti hinkwayo ro fambisa xiphephana lexintshwa lexi nge, Hi Nga Ti Kuma Kwihi Tinhlamulo Ta Swivutiso Swa Nkoka eVuton’wini? leswaku ti pfuna vanhu ku nghena eka website ya tona ya jw.org leyi nga nawini. Website ya jw.org yi ni rungula leri hundzuluxeriwaka hi tindzimi to tala ku tlula ti-website tin’wana. Sweswi yi kumeka hi tindzimi ta kwalomu ka 500 naswona yi ni minkandziyiso leyi kopekaka hi tindzimi ta kwalomu ka 700.

Siku ni siku, vanhu vo tlula miliyoni va nghena eka jw.org. Website leyi yi ni swihloko ni tivhidiyo leti nyikaka xitsundzuxo lexi pfunaka eka vanhu va malembe yo hambana-hambana, va tinxaka to hambana-hambana ni va swiyimo swo hambana-hambana. Yin’wana ya tivhidiyo leti, leyi nge Ha Yini U Fanele U Dyondza Bibele? yi ta linkiwa eka Khodi yo Nghena hi ku Hatlisa eka jw.org leyi kumekaka eka xiphephana lexintshwa. Vhidiyo leyi yi ni swifaniso swa xiviri ni leswi mpfampfarhutiweke leswaku swi komba vuyelo lebyi tsakisaka loko u dyondza Bibele. Ku sukela loko yi humesiwile hi November 18, 2013, yi kopiwe minkarhi ya kwalomu ka 4 wa timiliyoni naswona sweswi yi kumeka hi tindzimi to tlula 450.

J. R. Brown, muvulavuleri wa Timbhoni ta Yehovha entsindza wa tona wa misava hinkwayo eBrooklyn, le New York, u te: “Hi tsakile swinene hi tsima leri. Ku ni Timbhoni ta Yehovha ta kwalomu ka nhungu wa timiliyoni emisaveni hinkwayo naswona hinkwerhu ka hina hi ta va hi vulavula ni vaakelani va hina hi website leyi. Leri swi nga endleka ku ri tsima lerikulu eka hinkwawo lawa hi nga tshama hi va na wona.”

Geoffrey Jackson, xirho xa Huvo leyi Fumaka ya Timbhoni ta Yehovha u te: “Ku sukela loko yi humesiwile emalembeni mambirhi lama hundzeke, vanhu emisaveni hinkwayo va kume jw.org ku ri xitirhisiwa lexi pfunaka swinene. Eka website leyi, u nga hlalela tivhidiyo leti nga pfunaka vana va wena, u hlaya swihloko leswi nga pfunaka ndyangu wa wena u tlhela u hlaya ni Bibele. Leswi endleke leswaku hi sungula tsima leri ro hlawuleka hileswi hi lavaka leswaku vanhu vo tala va vuyeriwa hi ku tirhisa jw.org.”

Media Contact(s):

International: J. R. Brown, Office of Public Information, tel. +1 718 560 5000

Afrika-Dzonga: Mzamo Goloda, +27 11-761-1000