Hi Ravumbirhi ra March 21, 2017, Huvo leyi Fumaka ya Timbhoni ta Yehovha yi kombele vamakwerhu emisaveni hinkwayo leswaku va tsalela valawuri va mfumo mapapila ya xikombelo lava xungetaka ku yirisa mintirho ya hina eTikweni ra Rhaxiya. Hambileswi hi nga yi tiviki hi ku kongoma nhlayo ya lama fikeke eka valawuri va le Rhaxiya, kambe vamakwerhu vo hlaya va kume tinhlamulo ta mapapila ya vona xifumo. Hambileswi mfumo wa Rhaxiya wu hlawule ku tumbeta swikombelo sweswo swa ku titsongahata ivi yi tirhisa matimba ya yona hi ndlela yo biha ku hlasela vugandzeri bya vamakwerhu, tsima ri hlamarise misava hinkwayo hi ta vun’we lebyi nga kona eka nhlengeletano ya Yehovha. Swi tlhele swi tiyisekisa vagandzerikulorhi va le Rhaxiya leswaku vamakwerhu emisaveni hinkwayo va lunghekele ku va seketela.—1 Petro 2:17.

Timbhoni to tala ti endle matshalatshala lamakulu leswaku ti katseka eka tsima leri. Eka matiko man’wana, ku rhumela papila eRhaxiya a swi durha swinene, kutani lava nga ni mali va nyikerile leswaku lava nga riki na mali va kota ku hoxa xandla eka tsima ro rhumela mapapila. Eka swiyimo swin’wana, vahuweleri va boheke ku fambisa mapapila ya vona hi vanghana va le matikweni man’wana laha timhaka to posa ti nga durhiki. Vamakwerhu vo tala va hlengeletanile tanihi mindyangu kumbe hi mavandlha ivi va tsala mapapila va ma rhumela hi xijumba. Hi ku endla tano, a swi kombisanga leswaku vamakwerhu va ni vun’we ntsena, kambe swi endle leswaku xiendlakalo lexi, xi va lexi nga rivalekiki.

Ku tlhele ku va ni swiviko swin’wana swa vatirhi va le tiposweni lava seketeleke tsima leri. Hi xikombiso, mulanguteri wa ndzawulo ya poso wa le Barranquilla, eColombia, u te: “Ndzi hlamarisiwe hi vun’we lebyi mi nga na byona emisaveni hinkwayo, nileswaku mi hlanganile hi xikongomelo lexinene xa mhaka leyi ya le Rhaxiya. Kunene swa tsakisa hikuva leswi humelelaka laha Barranquilla, swi le ku endlekeni ni le matikweni man’wana emisaveni hinkwayo. Ndzi ni tshembo wa leswaku ni vanhu van’wana va swi xiya leswaku rungula leri, i ra nkoka swinene.” Le Anseong, eKorea Dzonga, mulawuri wa poso u pfulele Timbhoni ta Yehovha nyangwa wa tona leswaku ti kota ku rhumela mapapila a tlhela a ti nyika ni timvhilopho ta mahala leti nga ni xitempe xo rhumela mapapila ematikweni ya le ntsungeni.

Yaroslav Sivulskiy, loyi a nga muvulavuleri wa Timbhoni ta Yehovha, u te: “Loko vamakwerhu va le Rhaxiya va twa leswaku Huvo leyi Fumaka yi nyike mpfumelelo wa tsima ra misava hinkwayo ro tsala mapapila hikwalaho ko seketela vona, va swi tivile leswaku ku nga khathariseki xiboho lexi nga ta tekiwa ekhoto, a va voxe eripfumelweni.”

Mark Sanderson wa xirho xa Huvo leyi Fumaka u te: “Tsima leri ro tsala mapapila ri swi kombisa kahle leswaku vanhu va Yehovha va ni vun’we. Leswi hi yaka hi nghena eka makumu ya mafambiselo lawa, vun’we bya hina byi ta hi pfuna leswaku hi pona. Leswi hi yimeleke ku vona loko Yehovha a kongomisa timhaka eRhaxiya, hi ta pfuna vamakwerhu hilaha hi nga kotaka hakona. Nakambe hi ta ya emahlweni hi khongela hi vun’we eka Yehovha, hi ri ni ntshembo wa leswaku Xikwembu xa hina xi ta va khathalela hi tindlela hinkwato.”—Pisalema 65:2.