MAPUTO, eMozambhiki—Mpfula ya matimba leyi neke mavhiki exifundzheni xa Zambezia eMozambhiki, ku sukela hi December ku ya fika exikarhi ka January, yi dlaye vanhu va 158. Rhavi ra Timbhoni ta Yehovha ra le Mozambhiki ri vika leswaku ku hava Mbhoni leyi nga fa kumbe ku vaviseka. Hambiswiritano, ndhambi leyi yi onhe miako yimbirhi yo gandzela eka yona, ku nga Tiholo ta Mfumo yi tlhela yo onha ni makaya ya Timbhoni ya 225.

Timbhoni ti simeke tikomiti to hlayanyana ta mphalalo leswaku ti khathalela swilaveko swa Timbhonikulorhi leti khumbiweke hi mhangu leyi. Tiholo tin’wana ta Mfumo ti tirhisiwe swa nkarhinyana tanihi ndhawu ya byetlelo ni ya ku phakela swakudya. EChire, kwalomu ka 1 500 wa tikhilomitara ku suka eMaputo, ndhambi leyi yi onhe mabuloho lama Timbhoni to tlula 1 300 ti tsemakanyaka hi wona. Nhlangano wa Swihahampfhuka swo Rhwala swa vanhu eMozambhiki wu nyike Timbhoni mpfumelelo wo tirhisa helekhopta leswaku ti yisa swakudya swa 17 wa tithani exifundzheni.

Alberto Libombo, muvulavuleri wa Timbhoni ta Yehovha eMozambhiki, u te: “A swi tsakisa ku vona ku hanana ka Timbhonikulorhi hi ku va ti pfuneta hi ku phalala. Rhavi ra le Mozambhiki ri ya emahlweni ni lunghiselelo ro phalala hi swakudya ni ku lunghisa ri tlhela ri aka makaya hi vuntshwa. Hi ta ya emahlweni hi endla hi laha hi nga kotaka ha kona leswaku hi pfuna lava weriweke hi mhangu leyi ni ku va chavelela hi matsalwa.”

Media Contact(s):

International: J. R. Brown, Office of Public Information, tel. +1 718 560 5000

Mozambique: Alberto Libombo, tel. +258 21 450 500

Afrika-Dzonga: Mzamo Goloda, +27 11-761-1000