Tinguva ta mpfula ya matimba ti vange ndhambi eNigeria ngopfungopfu eswifundzheni leswi nga exikarhi ni le dzongeni wa tiko. Nambu wa Benue ni wa Niger, leyi ku nga yona leyikulu etikweni yi khapakhapile lerova yi ya hlasela vanhu va magidi va sala va nga ha ri na makaya kasi vo tlula 100 va file.

Swiviko swo sungula swi kombise leswaku ku hava makwerhu la feke kumbe ku vaviseka. Hambiswiritano, ndhambi leyi yi siye vahuweleri va 2 000 va nga ri na makaya naswona vo tlula 1 000 va lava ku phalariwa. Vo tala lava balekeke emakaya ya vona va kume vutumbelo emakaya ya Timbhoni leti tshamaka etindhawini leti nga hlaseriwangiki.

Ku rhumeriwe Komiti ya Mphalalo leswaku yi langutela ntirho wo phalala ni ku khutaza vamakwerhu. Vamakwerhu vambirhi va Komiti ya Rhavi ra le Nigeria, mulanguteri wa muganga ni vamakwerhu lava tirhaka eka Ndzawulo ya Ntirho ni va Ndzawulo yo Pulana ni yo Aka va endzele vahuweleri etindhawini leti hlaseriweke hi ndhambi leswaku va ya va seketela.

Ku nga khathariseki swiphiqo leswi vangiweke hi ndhambi leyi, Tata wa hina Yehovha u ya emahlweni a va ‘xisirhelelo hi nkarhi wa maxangu.’—Pisalema 37:39.