MANILA, ePhilippines—Vanhu vo tlula 1 000 va dlayiwile naswona vo tlula 970 000 va boheke ku baleka emakaya ya vona endzhaku ka xidzedze xa matimba lexi hlakateke tiko ra Philippines hi Ravumbirhi, December 4, 2012. Hambileswi se ku hundzeke n’hweti, Timbhoni ta Yehovha ti ya emahlweni ti phalala vanhu lava hlaseriweke hi Xidzedze xa Bopha, (lexi etikweni rero xi vitaniwaka Pablo).

Hi January 7, rhavi ra Timbhoni ta Yehovha leri nga eManila ri tiyisekise leswaku Timbhoni ta ntlhanu ti file hikwalaho ka xidzedze. Kasi Mbhoni yin’wana yi yisiwe exibedlhele endzhaku ko vaviseka swinene enhlaneni. Ku engetela kwalaho, mindyangu ya kwalomu ka 520 ya Timbhoni yi rhurhiseriwe kun’wana tanihi leswi makaya ya 140 ma mbundzumukeke kasi man’wana ya 400 ma onhakeke.

Vayimeri va rhavi va endzele tindhawu leti hlaseriweke hi xidzedze leswaku va kambela ku onhaka loku veke kona, va hlela mphalalo ni ku va chavelela hi tlhelo ra moya lava poneke. Timbhoni ti vumbe komiti yo phalala leswaku ti hlela tindhawu ta nkombo to phalala ni ku pfuna vatirhi va ku tirhandzela va kwalaho leswaku va yisela vanhu swilo swo phalala.

Etindhawini tin’wana ta tiko rero, xidzedze xi khukhule masimu ya swibyariwa leswi dyiwaka ngopfu ni tindhawu to tirhela eka tona, ku katsa ni masimu ya rhayisi, mapurasi ya tibanana ni misinya ya tikhokhonati. Kutani tikomiti to phalala ta Timbhoni ti rhumele tilori leti a ti rhwale swakudya leswi tlulaka 12 972 wa tikhilogiramu. Hambiswiritano, swakudya sweswo a swi kotanga ku fika eka yin’wana ya tindhawu leti hlaseriweke hileswi buloho ri onhakeke.

Xidzedze xa Bopha xi tlhele xi onha miako ya vugandzeri leyi vuriwaka Tiholo ta Mfumo ni ku mbundzumuxa yimbirhi. Hambiswiritano, vanhu van’wana lava balekeke emakaya ya vona hikwalaho ka xidzedze va rhurhiseriwe swa xinkarhana eTiholweni ta Mfumo leti nga onhakangiki. Komiti yo phalala yi le ku tirheni hi matimba leswaku yi rhurhisela vanhu lava hlaseriweke emakaya lama nga exiyin’weni lexi faneleke.

Ntirho hinkwawo wo phalala wu seketeriwa hi minyikelo ya Timbhoni ta Yehovha ta le tikweni rero ni ya Timbhoni ta le matikweni ya misava. Huvo leyi Fumaka ya Timbhoni ta Yehovha yi pfuna ku hakelela swikoxo swo tano hi ku tirhisa mali leyi nyikeriweke ku seketela ntirho wa misava hinkwayo wa Timbhoni.

Dean Jacek, muvulavuleri wa Timbhoni ta Yehovha ePhilippines, u te: “Hinkwerhu hi rila ku fa ka vanghana ni vagandzeri-kulorhi naswona hi hele matimba hikwalaho ka ku onhaka loku vangiweke hi xidzedze lexi. Kambe hi ta hambeta hi endla leswi hi nga swi kotaka leswaku hi pfuna hi ku phalala ku katsa ni ku chavelela vaakelani va hina hi tlhelo ra moya.”

Media Contacts:

International: J. R. Brown, Office of Public Information, tel. +1 718 560 5000

Philippines: Dean Jacek, tel. +63 2 411 6090

Afrika-Dzonga: Mzamo Goloda, +27 11-761-1000