NEW YORK—Hi Ravumune June 6, 2013, Huvo ya Yuropa ya Timfanelo ta Vanhu (European Court of Human Rights [ECHR]) yi lerise tiko ra Rhaxiya leswaku ri riha Manana V. Zhukova na Manana Y. Avilkina mali leyi ringanaka R65 000 ha un’we. Vatirhela-mfumo va tiko ra Rhaxiya a va kume tirhekhodo ta swa vutshunguri leti nga xihundla ta Manana Zhukova na Manana Avilkina handle ka mpfumelelo wa vona. Huvo yi teke xiboho xa leswaku sweswo swi lwisana ni timfanelo ta xisekelo ta ku sirheleriwa ka rungula ra munhu ra xihundla leti vuriwaka “nawu wa nkoka” lowu tiyisekisiweke hi Ntwanano wa Yuropa.

Xiboho lexi xa Huvo xi tekiwe endzhaku ka malembe yo tlula ntlhanu ku tengiwa nandzu lowu. Hi 2007, Xandla xa Muchuchisi eDorobeni ra St. Petersburg xi lerise swibedlhele swa le dorobeni rero leswaku swi rhumela “swikombelo hinkwaswo swa Timbhoni ta Yehovha swo ala ku pomperiwa ngati ni swiaki swa yona ehofisini ya muchuchisi handle ko tivisa kumbe ko kombela mpfumelelo wa muvabyi. Hikwalaho, hi March 9, 2009, Timbhoni ti mangale nandzu lowu vuriwaka Avilkina and Others v. Russia eka Huvo ya Yuropa ya Timfanelo ta Vanhu. Eka xiboho xa yona, Huvo yi vule leswaku swiendlo swa vatirhela-mfumo va tiko ra Rhaxiya “swa tshikilela” naswona yi vule leswaku a swi kona nikatsongo “swivangelo leswi twalaka” swo nyika vatirhela-mfumo rungula leri ra xihundla.

Loko Grigory Martynov, muvulavuleri wa Timbhoni ta Yehovha eRhaxiya, a vulavula hi vuyelo lebyinene bya xiboho xa nandzu lowu u te: “Xiboho lexi xa Huvo xi ta pfuna leswaku ku sirheleriwa timfanelo ta xisekelo ta vaaka-tiko hinkwavo va Rhaxiya ni va le matikweni man’wana lama nga swirho swa Huvo ya Matiko ya Yuropa.”

Media Contact(s):

International: J. R. Brown, Office of Public Information, tel. +1 718 560 5000

Russia: Grigory Martynov, tel. +7 812 702 2691

Afrika-Dzonga: Mzamo Goloda, +27 11-761-1000