Hi April 20, 2017, hambileswi ku tsariweke mapapila emisaveni hinkwayo, Khotonkulu ya Russia yi pasise mhaka ya leswaku ntirho wa Timbhoni ta Yehovha wu yirisiwa eRussia. Muavanyisi wa Khotonkulu Yuriy Grigoryevich Ivanenko u yime ni Ndzawulo ya Vululami eka xikombelo lexi yi xi endleke xa leswaku “ku pfariwa Rhavi rale Russia ra Timbhoni ta Yehovha ni mavandlha hinkwawo naswona nhundzu hinkwayo ni miako swi ta tekiwa hi mfumo.”

Muavanyisi Ivanenko u tlhele a vula leswaku xiboho lexi xi ta namba xi sungula ku tirha naswona Timbhoni ta Yehovha ti yirisiwile eRussia. Hambileswi Timbhoni ta Yehovha ti endlaka aphili eka Huvonkulu ya Aphili, sweswi ntirho wa tona wu yirisiwile.

Vasiliy Kalin loyi a nga yisiwa eSiberia loko a ri ni malembe ya mune ni vatswari vakwe hileswi va nga Timbhoni ta Yehovha u te: “Xiboho lexi nga tekiwa hi huvo namuntlha, xi ta endla leswaku vutomi bya Timbhoni ta le Russia byi cinca hi ku helela. Sweswi ti le khombyeni ra ku tengisiwa ni ku khotsiwa loko to kumiwa ti endla mintirho ya tona.”

Philip Brumley, loyi a nga Gqwetankulu ra Timbhoni ta Yehovha u te: “Xiboho lexi endliweke namuntlha xi heta matimba. Mapapila lama tsariweke hi Timbhoni emisaveni hinkwayo ni vumbhoni lebyi nyikeriweke ehubyeni swi komba leswaku—Timbhoni ta Yehovha a hi mimpambukwa. Hi endle aphili.”