APRIL 22, 2014
RUSSIA
Vaaka-tiko Va Le Rhaxiya Va Tengisiwa Hikwalaho Ka Ripfumelo Ra Vona
Eka nandzu wo sungula le Rhaxiya, Timbhoni ta Yehovha * ta 16 eTaganrog ti tengisiwa hileswi ti hlanganaka ti gandzela Xikwembu ni ku hanya hi ku pfumelela ni ripfumelo ra tona. * Loko to voniwa nandzu, ti nga ha rihisiwa ku hakela mali ya kwalomu ka ti-rubles ta 300 000 (ku nga R100 000) kumbe ti khotsiwa kwalomu ka malembe ya nhungu. Timbhoni leti ta 16 ti lerisiwe leswaku ti nga suki exifundzheni xa Taganrog kukondza huvo yi teka xiboho.
Endzhaku ka loko Huvo leyi Tlakukeke yi teke xiboho, valawuri va le Taganrog va teke Holo ya Mfumo (muako wa vugandzeri) ya Timbhoni ta Yehovha, leswi endleke leswaku Timbhoni ti gandzela Xikwembu emakaya ya tona. Huvo yi tlhele yi lerisa valawuri leswaku va nghenisa minkandziyiso ya 34 eka Nxaxamelo wa Tiko wa Swilo leswi nga ni Khombo. Timbhoni ta Yehovha ti yise xikombelo xo herisa nandzu lowu eka Huvo ya Matiko ya Yuropa ya Timfanelo ta Vanhu.
Valawuri va le Taganrog va tirhisa swiendlakalo sweswo tanihi xivangelo xo xanisa Timbhoni. Hi 2011, maphorisa ma nghene emakaya ya 19 ya Timbhoni hi awara ya tsevu nimixo, laha ma heteke tiawara ta 8 ku ya eka 11 ma ri karhi ma secha minkandziyiso leyi tekiwaka yi ri ni khombo. Maphorisa lawa ma teke minkandziyiso hinkwayo ya Timbhoni swin’we ni swilo swa tona hinkwaswo hi nkani. Valawuri va tlhele va teka vhidiyo ya le xihundleni ya minhlangano leswaku va ta kota ku vona lava a va ri kona nandzu. Swiendlakalo swa le Taganrog swi sungule tsima leri seketeriweke hi mfumo ro xanisa Timbhoni ta Yehovha eRhaxiya. *
Timbhoni ta Yehovha i vukhongeri lebyi tivekaka emisaveni hinkwayo. Nawu wa le Rhaxiya ni Ntwanano wa Yuropa wa Timfanelo ta Vanhu wu vula leswaku vanhu va ni ntshunxeko wo gandzela. Tihuvo leti Tlakukeke emisaveni hinkwayo ti tiyisekise leswaku Timbhoni ta Yehovha ti ni mfanelo ya ku gandzela ti ntshunxekile. Kambe, swilo leswi valawuri va le Taganrog va swi endlaka, swi kombisa leswaku Timbhoni a ti faneriwi hi mfanelo leyi.
Ku tengisiwa loku ka ha ya emahlweni naswona ku la nguteriwe leswaku ku ta hela hi May loko huvo yi teka xiboho. Loko huvo yo vona Timbhoni leti ta 16 nandzu, sweswo swi ta xungeta mfanelo ya Timbhoni to tlula 800 eTaganrog yo gandzela hi ku ntshunxeka. Leswi swi nga tlhela swi pfuxa swihehlo swin’wana swa milandzu leyi nga si tengiwaka ya Timbhoni leti nga eswifundzheni swin’wana swa le Rhaxiya.
Grigory Martynov, muvulavuleri wa Timbhoni ta Yehovha eRhaxiya, u te: “Ku kavanyetiwa ku gandzela ka hina hi ku ntshunxeka a hi swinene. Timbhoni ta Yehovha a ti nxungeti eka vuhlayiseki bya mfumo wa Rhaxiya. Ku xanisiwa ni ku vengiwa loku swi vangiwa hi leswi ti nga Timbhoni ta Yehovha.”
^ ndzim. 2 Exifanisweni lexi nga laha henhla, ku humelela ntsena Timbhoni ta 10 eka ta 16.
^ ndzim. 2 Valawuri va le Rhaxiya va mangalele Timbhoni ta 16 hi 2012 ehansi ka Xiyenge xa vu-282.2(1) na (2) xa Milawu ya Vugevenga ya Tiko ra Rhaxiya, leyi xigwevo xa yona xi nga vaka malembe manharhu ekhotsweni. Nakambe vakulu va vandlha va mune va mangaleriwe ehansi ka Xiyenge xa vu-150(4), xa Milawu ya Vugevenga, leyi xigwevo xa yona xi nga vaka malembe ya ntlhanu ku ya eka nhungu ekhotsweni.
Hi June 2008, Timbhoni ta Yehovha ti sungule ku xanisiwa eTaganrog loko Muchuchisi wa le Xifundzheni xa Rostov a pfumele leswaku ku pfariwa ku tlhela ku yirisiwa Nhlangano wa Vukhongeri wa Timbhoni ta Yehovha eTaganrog. U tlhele a vula leswaku minkandziyiso leyi kandziyisiwaka hi Timbhoni ta Yehovha yi ni rungula leri nga ni khombo. Huvo leyi pfuxetaka milandzu yi amukele xikombelo xa muchuchisi naswona Huvo leyi Tlakukeke ya le Rhaxiya yi teke xiboho hi December 8, 2009.
^ ndzim. 4 Ku sukela hi December 8, 2009, endzhaku ka loko Huvo leyi Tlakukeke ya le Rhaxiya yi teke xiboho, maphorisa ma khome Timbhoni to tlula 1 600, ma yirisa minkandziyiso ya tona yo tlula 70, ma nghena hi nkani emakaya ya 171 ya Timbhoni ni le tindhawini ta tona to gandzela ma tlhela ma ti kavanyeta etindhawini ta tona ta 69 to gandzela.
U Nga Ha Tsakela
MAHUNGU YA SWESWINYANA
Tiko Ra Rhaxiya Ri Bakanya Mfanelo Ya Ntshunxeko Wa Vukhongeri
Timbhoni ta Yehovha ti hehliwa hi nandzu wa vugevenga exidorobanini lexitsongo xa Taganrog. Holo ya Mfumo swin’we ni minkandziyiso ya tona swi tekiwe hi nkani.