NOVEMBER 21, 2014
UKRAINE
Xiviko Xa Sweswinyana: Timbhoni Ta Yehovha Ti Hlele Mphalalo Wa Vabaleki Va Magidi eUkraine
ELVIV, le Ukraine—Timbhoni ta Yehovha ti ya emahlweni ti pfuna vagandzeri-kulobye lava balekeke emakaya ya vona hikwalaho ka nyimpi leyi nga kona evuxeni bya Ukraine.
Eka Timbhoni leti lavaka ku ringana 7 500 leti balekeke endhawini leyi ku lwiwaka eka yona, ta kwalomu ka 4 000 ti khathaleriwa hi tikomiti ta nkombo ta mphalalo leti hleriweke hi rhavi ra Timbhoni ta Yehovha ra Ukraine leri nga eLviv. Timbhoni letin’wana leti kumbiweke hi tinyimpi ti rhurheriwe hi maxaka ni vagandzeri-kulobye eUkraine ni le Rhaxiya. Tikomiti tin’wana ta tsevu ti khathalela Timbhoni to tlula 17 500 leti ta ha riki endhawini leyi ku lwiwaka eka yona.
Tibomo ti onhe tiyindlu to hlayanyana ta Timbhoni, ku katsa ni yindlu leyi, leyi nga eximutanini xa Semenivka, endhawini ya le Donetsk.
Rhavi ra le Lviv ri tiyisekise leswaku Timbhoni ta tsevu ti file ku sukela loko nyimpi yi sungurile. Mbhoni yin’wana ya le Kramatorsk yi fe hi June 17, 2014, loko bomo yi buluke ekusuhi ni movha lowu a yi ri eka wona. Tibomo ti tlhele ti dlaya Timbhoni tin’wana ta ntlhanu leti tshamaka edorobeni ra Donetsk, Sloviansk, Rozkishne ni ra Luhansk.
Tanihi xiphemu xa mphalalo, rhavi ri tlhela ri kongomisa ku akiwa hi vuntshwa ka miako yo hlayanyana ya vugandzeri ni tiyindlu ta Timbhoni.
Timbhoni ti lunghisa lwangu ra yindlu leyi onhakeke edorobeni ra Sloviansk.
Media Contact(s):
International: J. R. Brown, Office of Public Information, tel. +1 718 560 5000
Ukraine: Vasyl Kobel, tel. +38 032 240 9323
Afrika-Dzonga: Mzamo Goloda, +27 11-761-1000
U Nga Ha Tsakela
MAHUNGU YA SWESWINYANA
Xiviko Xa Timbhoni Xa Le Ukraine Ni Le Crimea
Ku nga khathariseki mpfilumpfilu lowu nga kona, Timbhoni ti ta khoma tinhlengeletano ta kwalomu ka 40 le Ukraine ni le Crimea leti nga ta kandziyisa vumundzuku lebyinene ehansi ka Mfumo wa Xikwembu.