FEBRUARY 27, 2015
UNITED STATES
Timbhoni Ti Kuma Masagwadi Hikwalaho Ka Miako Ya Tona
NEW YORK—Timbhoni ta Yehovha leti tivekaka hi ntirho wa tona wo chumayela emisaveni hinkwayo, ti kume sagwadi hikwalaho ka ndlela leyi ti nga onhiki mbango loko ti aka.
Ntlawa wa Green Building Initiative (GBI) wu nyike Timbhoni switifiketi hikwalaho ka miako ya tona yimbirhi leyintshwa leyi nga eUnited States erhavini ra le Wallkill, le New York: Muako wo Tshama wa F, lowu heleke ku akiwa hi 2012 ni Muako wa Tihofisi, lowu nga hela hi 2014. Miako leyi hi yona leyi endleke leswaku Timbhoni ti kuma masagwadi ya le henhla lama humaka eka Four Green Globes.
Muako wa Tihofisi eWallkill
Shaina Sullivan, Mukongomisi wa Vunavetisi wa ntlawa wa GBI u ri: “Emisaveni hinkwayo, ko va tiphesente leti nga ehansi ka mune ta miako leyi kumeke switifiketi swa le henhla swa Four Green Globes.” Sullivan u tlhele a vula leswaku Muako wa Tihofisi wa le Wallkill “hi wona wo sungula le New York State ku kuma xitifiketi lexi.” Jenna Middaugh, Minijhere wa Tsima ra GBI, u te: “Ku sukela hi 2006, exikarhi ka miako ya 23 [eUnited States] leyi nyikiweke switifiketi swa Four Green Globes, Muako wa Hofisi ya Watchtower eWallkill hi wona lowu wu yi tlulaka hinkwayo hi 94 wa tiphesente.”
Muako wo Tshama wa F
Ntlawa wa GBI wu langutela Green Globes tanihi lowu kambelaka miako ni ku pasisa mimpfampfarhuto ni ku akiwa ka miako. Ku kuma xitifiketi swilaveko xa Green Globes, ku laveka mpfampfarhuto wa muako lowu kombisaka ku nga tirhisiwi mati yo tala, gezi ro tala ni ndlela leyi wu nga onhiki mbango ha yona.
Tisolar ti kota ku pfuneta hi gezi ra kwalomu ka 10 wa tiphesente eka Muako wa Tihofisi eWallkill, ku nga leswi nga endla leswaku Timbhoni ti kuma sagwadi ro aka.
David Bean, murhangeri eka mimpfampfarhuto ya miako ya Timbhoni eUnited States, u ri: “Switifiketi leswi hi swi kumeke swi kombisa ku hleleka ka mimpfampfarhuto ni ntirho wo aka lowu hi wu endleke eka mintirho ya hina hinkwayo. Nakambe hi lava Green Globes yi pasisa mimpfampfarhuto ni ntirho wo aka Ntsindza wa hina lowuntshwa wa misava hinkwayo eWarwick, le New York.”
Ku ri karhi ku byariwa swimilana swa rihlaza elwangwini entsindza wa Timbhoni eWarwick, le New York.
Zeny St. Jean, loyi a langutelaka ntirho wa ku mpfampfarhuta wa matsima yo aka emisaveni hinkwayo ya Timbhoni ta Yehovha, u ri: “Tanihi leswi xikongomelo xa hina ku nga ku yisa emahlweni ntirho wo chumayela rungula ra le Bibeleni, ha ma tlangela masagwadi lawa tanihi leswi kombisaka ndlela leyi mimpfampfarhuto ya miako yi endliweke ha yona ni ntirho wo aka lowu hi ringetaka ku wu endla eka miako ya hina emisaveni hinkwayo swi xiyiwile.”
Media Contact(s):
International: J. R. Brown, Office of Public Information, tel. +1 718 560 5000
Afrika-Dzonga: Mzamo Goloda, +27 11-761-1000