NEW YORK—Hi July 5, 2013, Timbhoni ta Yehovha ti sayine mpfumelelano wo xavisa miako ya ntlhanu leyi a yi tirhiseriwa ku kandziyisa eBrooklyn le New York, swin’we ni muako wo tshama eka wona wa swithezi swa 30 eka Tikhampani ta RFR na Kushner. Timbhoni ti ta rhurha eka muako wo kandziyisela eku sunguleni ka August lembe leri. Eka muako lowu ti tshamaka eka wona ti ta rhurha hi 2017.

David Semonian la nga muvulavuleri wa Timbhoni ta Yehovha eka swihaxa-mahungu u ri: “Loko vahundzi va ndlela ni lava endzelaka Doroba ra New York va tsemakanya Buloho ra Brooklyn, va vona mfungho lowu nge ‘Hlaya Rito Ra Xikwembu Ku Nga Bibele Yo Kwetsima, Siku Ni Siku’ ni lowu nge ‘Hlaya Xihondzo xo Rindza ni Xalamuka! Se ku hundze malembe yo tala ntirho lowu endliwaka eka miako leyi wu ri wa nkoka ematin’wini ya nhlengeletano ya hina eBrooklyn.” Timbhoni a ti tirhisa miako leyi ya ntlhanu ku kandziyisa Tibibele ni minkandziyiso leyi sekeriweke eBibeleni hi tindzimi to tala ku ringana malembe ya 77. Miako yo sungula yi sungule ku tirhisiwa hi 1927 naswona hi 1937 ku engeteriwe miako yin’wana. Muako wo tshama eka wona lowu nga ni swithezi swa 30 lowu a wu rhurhela vatirhi va kwalomu ka gidi a wu khomane ni muako wo gandlisela eka wona, leswi a swi endla leswaku va kota ku ya eka wona handle ko humela ehandle.

Timbhoni ti xavisa miako leyi tanihi leswi ti nga ta rhurhela endhawini leyi nga le kule ni doroba-nkulu. Hi 2004, ti sungule ti rhurhisela ndzawulo yo kandziyisa, yo hlanganisa tibuku ni yo rhumela minkandziyiso, ku suka eUnited States ku ya eWallkill le New York. Sweswi Timbhoni ti kunguhata ku rhurhisela ntsindza wa tona wa misava hinkwayo eWarwick le New York naswona ku hleriwe leswaku ntirho wo aka wu sungula eku heleni ka lembe leri.

Nkulukumba Semonian u tlhele a ku: “Ha ma tlangela matimu ya hina ya le Brooklyn. Hi tirhise miako leyi ku kandziyisa minkandziyiso leyi sekeriweke eBibeleni leyi pfunaka vanhu emisaveni hinkwayo. Hi swi langutele hi mahlo-ngati ku tirhisa miako ya hina leyintshwa eWarwick leswaku hi yisa emahlweni ntirho wa hina wo dyondzisa Bibele emisaveni hinkwayo.”

Media Contact(s):

International: J. R. Brown, Office of Public Information, tel. +1 718 560 5000

Afrika-Dzonga: Mzamo Goloda, +27 11-761-1000