NEW YORK—Timbhoni ta Yehovha ti pfule hi vuntshwa Holo ya Mintlango ya Stanley eJersey City le New Jersey hi April 13, 2013 endzhaku ka tin’hweti ta tsevu wu ri eku pfuxetiweni. Timbhoni se ti ni malembe lama lavaka ku ringana 30 ti tirhisa Holo ya Stanley tanihi Holo ya Tinhlengeletano laha ti khomaka kona minhlangano leyikulu ya mani na mani yo dyondzisa Bibele. Ku pfuxetiwa ka holo leyi swi endle leswaku yi va exiyin’weni lexinene xo va yi tirhiseriwa ku hetisisa xikongomelo xa yona tanihi ntsindza wo dyondzo ya mahala ya Bibele.

Switulu leswintshwa leswi hoxiweke swi endla leswaku vanhu lava tlulaka 250 000 lava vaka kona eka minongonoko yoleyo eholweni leyi va tshamiseka kahle. Endhawini leyi ku tshamiwaka eka yona ni le makamareni lama nga etlhelo ka yona ku hoxiwe michini ya manguva yo hlalerisa tivhidiyo leyi ngopfu-ngopfu yi endleriweke ku hlalela ha yona tivhidiyo ta Ririmi ra Mavoko ra le Amerika.

Ntirho hinkwawo wo pfuxeta holo leyi wu endliwe hi Timbhoni ta Yehovha leti ti tinyikeleke hi ku tirhandzela ku endla ntirho lowu. Vatirhi volavo va ku tirhandzela a va huma hi le swifundzheni swo hambana-hambana swa United States leswaku va hlanganyela eku pfuxetiweni ka muako lowu wa khale lowu nga ni matimu yo hlawuleka.

Holo ya Mintlango ya Stanley a yi ri ya nkoka swinene eNew Jersey ku sukela eku heleni ka va-1920. A ku ri yin’wana ya tiholo letikulu swinene to hlalela eka tona tifilimi leyi tshameke yi akiwa eUnited States. Hambiswiritano, yi boheke ku pfariwa hi 1978, kambe hi 1983, Timbhoni ta Yehovha ti yi xavile tanihi leswi a yi nga ha khathaleriwi. Kutani ku sukela hi 1985 loko yi pfuriwa hi vuntshwa, Timbhoni a ti yi tirhisa tanihi hi ndhawu yo dyondzisela eka yona Bibele.

Loko J. R. Brown, muvulavuleri wa Timbhoni ta Yehovha, a vulavula hi ku pfuxetiwa ka yona loku ka ha ku endliwaka sweswinyana, u te: “Holo ya Mintlango ya Stanley ngopfu-ngopfu yi tirhisiwa tanihi yindlu ya vugandzeri, laha vanhu lava humaka eka tindzimi to tlula 15 va hlanganaka kona leswaku va dyondza hi Bibele. Kambe holo leyi yi rhandziwa swinene ni hi vanhu va le New Jersey naswona nhlengeletano ya hina ya tsaka swinene leswi yi pfuneke ku hlayisa ndhawu leyi leyi nga ni matimu.”

Media Contact(s):

International: J. R. Brown, Office of Public Information, tel. +1 718 560 5000

Afrika-Dzonga: Mzamo Goloda, +27 11-761-1000