“Kuma ntsako lowukulu eka Yehovha, kutani u ta ku nyika leswi mbilu ya wena yi swi navelaka.”—Pisalema 37:4, Matsalwa Yo Kwetsima Ya Misava Leyintshwa.

 “Tsakela HOSI Xikwembu, kutani xona xi ta ku nyika leswi mbilu ya wena yi swi navelaka.”—Pisalema 37:4, Bibele Mahungu Lamanene.

 Mupisalema u khutaza malandza ya Xikwembu leswaku ma kuma ntsako hikuva ni vuxaka lebyinene na xona. Hinkwavo lava tiphinaka hi vuxaka byebyo va nga tiyiseka leswaku Yehovha a Xikwembu u ta enerisa ku navela ka vona hi ndlela leyi faneleke.

 “Kuma ntsako lowukulu eka Yehovha.” Xiga lexi xi nga ha tlhela xi vula ku “kuma ntsako lowu heleleke eka Yehovha,” “ku tsaka hi ku tirhela HOSI,” kumbe “ku tsaka hi leswi Hosi yi ku tshembiseke swona.” Loko hi gandzela Xikwembu xa ntiyiso swi vula leswaku hi ta “kuma ntsako lowukulu.” (Pisalema 37:4, nhlamuselo ya le hansi) Hikwalaho ka yini hi vula tano?

 Lava gandzelaka Yehovha va vona swilo hi ndlela leyi a swi vonaka hayona, hilaha Bibele yi vulaka hakona. A vo tiva Xikwembu ntsena va tiva ni leswaku i vutlhari ku xi yingisa. Hikwalaho ka sweswo va tshama va ri ni ripfalo leri baseke, naswona va papalata ku endla swihoxo swo tala ni ku endla swiboho leswi hoxeke. (Swivuriso 3:5, 6) Hi xikombiso, loko vanhu lava nga ni makwanga kumbe lava nga tshembekiki swi ti komba swilo swi va fambela kahle, vanhu va Xikwembu a va pfumeleli ku hlundzuka kumbe mavondzo ku kavanyeta ku rhula ka vona ka mianakanyo. (Pisalema 37:1, 7-9) Vanhu va Xikwembu va tsaka ku tiva leswaku ku nga ri khale, Xikwembu xi ta herisa vuhomboloki kutani xi hakela lava tshembekeke hikwalaho ka leswi va tshameke va tshembekile. (Pisalema 37:34) Va tlhela va va ni ntsako lowukulu tanihi leswi va swi tivaka leswaku va tsakisa Tatana wa vona wa le matilweni.—Pisalema 5:12; Swivuriso 27:11.

 “U ta ku nyika leswi mbilu ya wena yi swi navelaka.” Marito lawa ma nga ha tlhela ma hundzuluxeriwa hi ndlela leyi “u ta hlamula swikhongelo swa wena” kumbe “u ta ku nyika leswi u swi navelaka hi mbilu ya wena hinkwayo.” I ntiyiso leswaku Yehovha a nge hi nyiki xin’wana na xin’wana lexi hi xi kombelaka. Ku fana ni mutswari lonene, Yehovha u tiva leswinene leswi a nga swi endlelaka vana va yena. Ku engetela kwalaho, leswi hi swi kombelaka ni ndlela leyi hi hanyaka hayona swi fanele swi fambisana ni ku rhandza ka yena. (Swivuriso 28:9; Yakobo 4:3; 1 Yohane 5:14) Nakambe loko hi khongela eka “Mutwi wa swikhongelo” ha tiyiseka leswaku u ta hi yingisela.—Pisalema 65:2; Matewu 21:22.

 Pisalema 37 yi tsale hi hosi Davhida wa le Israyele ya khale. U tsale Pisalema hi ku landzelelana ka maletere. b

 Hakanyingi Davhida a khomiwa hi ndlela leyi nga riki yinene. A fanele a balekela Hosi Sawulo ni van’wana lava a va lava ku n’wi dlaya. (2 Samuwele 22:1) Hambiswiritano mikarhi hinkwayo Davhida a tshemba Xikwembu xakwe. Davhida a swi tiva leswaku Yehovha u ta xupula lavo homboloka. (Pisalema 37:10, 11) Hambiloko va vonaka swi va fambela kahle ku fana ni “byanyi bya rihlaza lebya ha ku milaka” eku heteleleni a va nge he vi kona.—Pisalema 37:2, 20, 35, 36.

 Pisalema 37 yi vulavula hi vuyelo byo hambana lebyi nga kona eka vanhu lava yingisaka milawu ya Xikwembu ni lava nga yi yingisiki. (Pisalema 37:16, 17, 21, 22, 27, 28) Pisalema leyi ya hi pfuna leswaku hi kuma vutlhari ni ku tlhela hi va muxaka wa vanhu lava Xikwembu xi va amukelaka.

 Hlalela vhidiyo leyi yo koma leswaku u vona nkatsakanyo wa buku ya Tipisalema.