TIVHESE TA BIBELE LETI HLAMUSERIWEKE

Marka 1:15—“Mfumo Wa Xikwembu Wu Le Kusuhi”

TLANGA

“Nkarhi lowu ku profetiweke ha wona wu fikile naswona Mfumo wa Xikwembu wu tshinele. Hundzukani mi va ni ripfumelo eka mahungu lamanene.”—Marka 1:15, Bibele—Matsalwa Yo Kwetsima Ya Misava Leyintshwa.

“Minkarhi yi hetisekile, Mfumo wa Xikwembu wu le kusuhi; hundzukani mi pfumela evhangeli.”—Marka 1:15, Bibele—Mahungu Lamanene.

Leswi Marka 1:15 Yi Vulaka Swona

Yesu Kreste u vule leswaku Mfumo wa Xikwembu a a wu ri “kusuhi,” kumbe “wu tshinele,” hikuva enkarhini lowu taka a a ta va Hosi ya Mfumo wolowo naswona a a ri kona loko a vula marito wolawo.

Yesu a a nga vuli swona leswaku Mfumo se wu sungule ku fuma. U tlhele a byela vadyondzisiwa vakwe leswaku Mfumo a wu ta sungula ku fuma enkarhini lowu taka. (Mitirho 1:6, 7) Hambiswiritano, a a fike hi nkarhi lowunene, ku nga lembe leri Bibele yi profeteke leswaku a a ta humelela hi rona tanihi Hosi ya nkarhi lowu taka. b Hikwalaho ka sweswo, Yesu u te: “Nkarhi lowu ku profetiweke ha wona wu fikile”—ku nga nkarhi lowu a sunguleke ntirho wakwe wo chumayela evhangeli, kumbe mahungu lamanene hi Mfumo.—Luka 4:16-21, 43.

Leswaku mahungu lamanene ya Mfumo ma vuyerisa vanhu, a va fanele va hundzuka, va tisola eka swidyoho leswi va tshameke va swi endla kutani va hanya hi milawu ya Xikwembu. Lava hundzukeke va kombise leswaku va ni ripfumelo eka mahungu lamanene lama vulavulaka hi Mfumo wolowo wa nkarhi lowu taka.

Mongo Wa Marka 1:15

Yesu u vule marito lawa loko a sungula ntirho wakwe wo dyondzisa eGaleliya. Tsalwa ra Matewu 4:17 leri na rona ri hlamuselaka mhaka leyi fanaka, ri vula leswaku “ku sukela enkarhini wolowo,” Yesu u chumayele hi Mfumo wa Xikwembu. Loko Yesu a dyondzisa a a vulavula ngopfu hi Mfumo wa Xikwembu. Mfumo wu boxiwa ku tlula ka 100 eka Tievhangeli c ta mune naswona laha wu boxiwaka kona eka Tievhangeli teto ku va ku ri marito ya Yesu. Eka rungula ra le Bibeleni, Yesu u vulavule ngopfu hi Mfumo wa Xikwembu ku tlula swilo leswin’wana.

Hlaya Marka ndzima 1 swin’we ni tinhlamuselo ta le hansi, tivhese leti fambisanaka na ndzima leyi, swifaniso ni mepe.

a Mfumo wa Xikwembu wu le tilweni naswona wu ta endla ku rhandza ka xona emisaveni. (Daniyele 2:44; Matewu 6:10) Leswaku u kuma leswi engetelekeke, hlaya nhlokomhaka leyi nge “Mfumo Wa Xikwembu I Yini?”

b Yesu a a ta va hosi leswaku a kota ku va Mesiya loyi ku profetiweke hi yena, ku nga muyimeri wo hlawuleka wa Xikwembu. Leswaku u kuma leswi engetelekeke hi vuprofeta lebyi kombisaka leswaku Yesu i Mesiya, hlaya nhlokomhaka leyi nge “Xana Vuprofeta Lebyi Vulavulaka Hi Mesiya Byi Ni Vumbhoni Bya Leswaku Yesu A Ri Mesiya?”

c Tievhangeli i tibuku to sungula ta mune leti vulavulaka hi vutomi bya Yesu ni ntirho wakwe naswona i xiphemu xa Matsalwa ya Vukreste ya Xigriki, lama talaka ku vitaniwa Testamente Leyintshwa.