TIVHESE TA BIBELE LETI HLAMUSERIWEKE

Pisalema 23:4—“Hambiloko Ndzi Famba Enkoveni Lowu Nga Ni Munyama Lowukulu”

TLANGA

“Hambiloko Ndzi Famba Enkoveni Lowu Nga Ni Munyama Lowukulu, A ndzi chavi nchumu xo biha, Hikuva wena u na mina; Nhonga ya wena ni nxongotelo ya wena swa ndzi chavelela.”—Pisalema 23:4. Bibele—Matsalwa Yo Kwetsima Ya Misava Leyintshwa.

“Ni loko ndzi nga famba enkoveni wa xinyami xo chavisa, a ndzi chavi nchumu xo biha, hikuva u na mina: Wa ndzi lwela ni ku ndzi hlayisa.”—Pisalema 23:4, Bibele Ya Mahungu Lamanene

Leswi Pisalema 23:4 a Yi Vulaka Swona

Lava gandzelaka Xikwembu va tiphina hi ku sirheleriwa hi xona hambiloko va langutane ni swiyimo swo tika. Vhese leyi yi tirhisa xifaniso xa murisi loyi a khathalelaka tinyimpfu takwe kahle ku kombisa ndlela leyi Xikwembu xi khathalaka ha yona hi vagandzeri va xona. b A va titwi va ri voxe loko va langutana ni swiyimo swo chavisa leswi hlamuseriweke eka vhese leyi, swo tanihi hi ndhawu leyi nga munyama lowukulu ni rifu. Va titwa va sirhelelekile onge hiloko Xikwembu xi ri kwalaho na vona.

Emikarhini ya Bibele murisi a tirhisa nhonga yakwe ku sirhelela tinyimpfu loko ti hlaseriwa. A tirhisa nhonga yakwe leyi hi ntolovelo a yi lehile yi tlhela yi va na xo haka emakumu ka yona leswaku a kota ku kongomisa tinyimpfu kumbe ku ti phula ekhombyeni. Hilaha ku fanaka, Yehovha Xikwembu u fana ni Murisi loyi a nga ni rirhandzu loyi a sirhelelaka ni ku kongomisa lava n’wi gandzelaka. Hambiloko va ri eswiyin’weni swo tika Yehovha u kombisa leswaku wa khathala hi vona hi tindlela to hambanahambana.

Wa va kongomisa ni ku va chavelela hi ku tirhisa Rito rakwe ku nga Bibele.—Varhoma 15:4.
U yingisa swikhongelo swa vona, a va nyika ku rhula emiehleketweni leswaku va nga karhateki.—Vafilipiya 4:6, 7
U tirhisa vagandzerikulobye leswaku a va khutaza.—Vaheveru 10:24, 25
U va nyika ntshembo lowu tiyeke hi vumundzuku, laha a nga ta herisa swiyimo leswi va langutaneke na swona.—Pisalema 37:29; Nhlavutelo 21:3-5.

Mongo Wa Pisalema 23:4

Pisalema 23 yi tsariwe hi Davhida, loyi loko a ha ri muntshwa a ri murisi naswona hi ku famba ka nkarhi u ve hosi ya le Israyele wa khale. (1 Samuwele 17:34, 35; 2 Samuwele 7:8) Pisalema leyi yi sungula hi ku hlamusela Yehovha tanihi Murisi loyi a rhangelaka, a phamelaka, a phyuphyisaka vagandzeri vakwe, ku fana ni leswi murisi wa tinyimpfu a swi endlaka.—Pisalema 23:1-3.

Eka Pisalema 23:4, loko a kandziyisa ndlela leyi Xikwembu xi hi sirhelelaka ha yona, Davhida se wa cinca u vulavula na Xikwembu hi ku kongoma u tirhisa rito ro fana ni leri nge, “wena”. Sweswo swi kombisa vuxaka lebyikulu lebyi Davhida a ri na byona na Yehovha. Davhida a a swi tiva leswaku Xikwembu xa khathala hi yena nileswaku Xi tiva miringo leyi a langutanaka na yona. Hikwalaho ka sweswo, Davhida a a nga chavi nchumu.

Eka tivhese timbirhi leti landzelaka kona kwala ka Pisalema 23 ku nga vhese 5 na 6, u cinca xifaniso lexiya xa le ku sunguleni xa murisi na tinyimpfu a tirhisa xa muendzi ni n’wini wa muti. Ku fana ni n’wini wa muti loyi a nga na malwandla, Yehovha u khoma Davhida tanihi muendzi loyi a xiximekaka. Hambi ku ri valala va Davhida a va nga ri na matimba yo n’wi sivela ku tiphina hi ndlela leyi Yehovha a a n’wi khathalela ha yona. Eku heteleleni ka Pisalema, Davhida u kombisa leswaku wa tshemba leswaku Xikwembu xi ta n’wi komba vunene ni rirhandzu vutomi byakwe hinkwabyo.

Swifananiso leswi tirhisiweke eka Pisalema 23 swi hlamusela rirhandzu leri Xikwembu xi yaka emahlweni xi ri kombisa vagandzeri va xona.—1 Petro 2:25.

a Eka Tibibele tin’wana Pisalema leyi yi tsariwe Pisalema 22. Hambileswi ku nga ni Tipisalema ta 150, Tibibele tin’wana ti ti hlaya hi ku ya hi matsalwa ya Xiheveru ya Vamosareti, loko tin’wana ti landzelela mahlayelo ya Septuagint ya Xigriki, ku nga matsalwa lama hundzuluxeriweke ku suka eka Xiheveru lama hetiweke kwalomu ka 200 B.C.E ku ya eka 101 B.C.E.

b Xikwembu lexi vito ra xona ku nga Yehovha mikarhi yo tala eBibeleni xi hlamuseriwa tanihi Murisi loyi a nga ni rirhandzu. Vagandzeri va xona va fanisiwa ni tinyimpfu leti lavaka ku sirheleriwa ni ku seketeriwa hi xona.—Pisalema 100:3; Esaya 40:10, 11; Yeremiya 31:10; Ezekiyele 34:11-16.