“Tinyikeleni, mi ta swi tiva leswaku ndzi Xikwembu. Ndzi ta tlakusiwa exikarhi ka matiko; Ndzi ta tlakusiwa emisaveni.”—Pisalema 46:10, Bibele—Matsalwa Yo Kwetsima Ya Misava Leyintshwa.

 “Swi tiveni leswaku hi mina Xikwembu. Ndzi le henhla ka vanhu hinkwavo, misava hinkwayo yi fuma hi mina.”—Pisalema 46:10, Bibele—Mahungu Lamanene.

 Xikwembu xi lava leswaku hinkwerhu hi xi gandzela hi tlhela hi tiva leswaku hi xona xi nga ni mfanelo yo fuma misava. Matimba ni vukulukumba bya xona swi lo tlangandla erivaleni, lowu i ntiyiso lowu hinkwavo lava lavaka ku hanya hilaha ku nga heriki va faneleke va wu tiva.—Nhlavutelo 4:11.

 “Tinyikeleni, mi ta swi tiva leswaku ndzi Xikwembu.” Eka vuhundzuluxeri byin’wana bya Bibele, ndzimana leyi yi sungula hi “miyelani.” Leswi swi endle vanhu va vona onge lexi i xileriso xa leswaku va fanele va kombisa xichavo kumbe ku miyela ekerekeni. Hambiswiritano, marito ya Xiheveru lama hundzuluxeriweke ma va “tinyikeleni, mi ta swi tiva leswaku ndzi Xikwembu” i xitsundzuxo lexi humaka eka Yehovha a Xikwembu hi byakwe a ma kongomisa eka vanhu va tinxaka hinkwato, u kombela vanhu leswaku va fanele va tshika ku n’wi kaneta, va swi tiva leswaku hi yena ntsena a nga ni mfanelo yo vangamisiwa ni ku tlhela a gandzeriwa.

 Xitsundzuxo lexi fanaka xi kumeka eka Pisalema 2. Kwalaho, Xikwembu xi tshembisa ku teka goza eka lava va xi kanetaka. Hi hala tlhelo, lava xi tshembaka va titshega hi xona loko va lava nkongomiso, matimba ni vutlhari. “Lava tumbelaka eka xona” va titwa va tsakile va tlhela va sirheleleka, ngopfungopfu loko va hlangana ni swiyimo swo tika.—Pisalema 2:9-12.

 “Ndzi ta tlakusiwa exikarhi ka matiko; Ndzi ta tlakusiwa emisaveni.” Enkarhini lowu nga hundza, Yehovha Xikwembu u vangamisiwile loko a tirhisa matimba ya yena lamakulu leswaku a sirhelela vanhu va yena. (Eksoda 15:1-3) Enkarhini lowu taka, u ta tlakusiwa emisaveni hinkwayo loko vanhu hinkwavo va ti veka ehansi ka vulawuri byakwe va tlhela va n’wi gandzela.—Pisalema 86:9, 10; Esaya 2:11.

 Buku yin’wana loko yi hlamusela Pisalema 46, yi vula leswaku “i risimu leri tlangelaka matimba ya Xikwembu, lexi sirhelelaka vanhu va xona.” Loko va yimbelela Pisalema 46, vanhu va Xikwembu a va tshemba leswaku Yehovha u ta va sirhelela ni ku tlhela a va pfuna. (Pisalema 46:1, 2) Marito wolawo ma va tsundzuxe leswaku Yehovha a ri na vona mikarhi hinkwayo.—Pisalema 46:7, 11.

 Leswaku va tiyisa ntshembo lowu va nga na wona wa leswaku Yehovha u na wona matimba ya ku va sirhelela, mupisalema u va tsundzuxe ku ehleketa hi swilo swo hlamarisa leswi Yehovha a va endleleke swona. (Pisalema 46:8) Ku engetela kwalaho, u vulavule ngopfu hi matimba ya Yehovha ya ku herisa tinyimpi. (Pisalema 46:9) Emikarhini ya ku tsariwa ka Bibele, Yehovha u herise tinyimpi hi ku sirhelela vanhu vakwe eka matiko lawa a ma ri valala. Hikwalaho, Bibele yi tshembisa leswaku ku nga ri khale, Xikwembu xi ta endla swo tlula sweswo hi ku herisa tinyimpi emisaveni hinkwayo.—Esaya 2:4.

 Xana ninamuntlha Yehovha wa ha va pfuna vagandzeri vakwe? Ina. Entiyisweni, muapostola Pawulo u khutaze Vakreste leswaku va titshega hi Yena loko va lava mpfuno. (Vaheveru 13:6) Marito lama kumekaka eka Pisalema 46, ma tiyisa ntshembo wa hina wa leswaku matimba ya Xikwembu ma ta hi sirhelela. Ma tlhela ma hi pfuna leswaku hi teka Xikwembu tanihi “vutumbelo ni matimba ya hina.”—Pisalema 46:1.

 Hlalela vhidiyo leyi yo koma leswaku u vona leswi hi swi dyondzaka eka buku ya Tipisalema.