TIVHESE TA BIBELE LETI HLAMUSERIWEKE

Yeremiya 29:11—“Ndzi Swi Tiva Kahle Leswi Ndzi Swi Ehleketaka Hi N’wina”

TLANGA

“‘Hikuva ndzi swi tiva kahle leswi ndzi swi ehleketaka hi n’wina,’ ku vula Yehovha, a ‘ndzi lava mi va ni ku rhula ku nga ri khombo, ndzi lava ku mi nyika vumundzuku lebyi mi byi languteleke.’”—Yeremiya 29:11, Bibele—Vuhundzuluxeri Bya Misava Leyintshwa.

‘“Makungu lawa ndzi nga na wona ehenhla ka n’wina, ma tiviwa hi mina ntsena. Mina HOSI ndzi ri, makungu ya kona i ya ku mi katekisa, ku nga ri ku mi vangela makhombo; ndzi mi tshembisa leswaku ma ha ta vona minkarhi leyi taka.”’—Yeremiya 29:11, Bibele Ya Mahungu Lamanene.

Leswi Yeremiya 29:11 Yi Vulaka Swona

Yehovha Xikwembu u tshembise vagandzeri vakwe leswaku enkarhini lowu taka u ta va nyika ku rhula. Hambileswi marito lawa a ma tsaleriwe vanhu va le nkarhini lowu hundzeke Xikwembu xa ha vula tano ninamuntlha. I “Xikwembu lexi nyikaka ntshembo.” (Varhoma 15:13) Kahlekahle, xi tsale switshembiso sweswo eBibeleni leswaku hi ta ‘chaveleleka’ hikwalaho ka vumundzuku.—Varhoma 15:4.

Mongo Wa Yeremiya 29:11

Marito lawa i xiphemu xa papila leri rhumeriweke Vaisrayele lava tekiweke eYerusalema va yisiwa evuhlongeni eBabilona. b (Yeremiya 29:1) Xikwembu xi va byele leswaku a va ta va mahlonga ku ringana nkarhi wo leha naswona a va fanele va aka tiyindlu, va rima masimu ni ku va ni mindyangu. (Yeremiya 29:4-9) Hambiswiritano, Xikwembu xi tlhele xi ku: “Loko ku hela malembe ya 70 mi ri eBabilona ndzi ta ta ndzi ta mi pfuna naswona ndzi ta endla leswi ndzi mi tshembiseke swona hi ku mi tlherisela [eYerusalema].” (Yeremiya 29:10) Xikwembu xi va tshembisile leswaku a xi nge va rivali ni leswaku ntshembo wa vona wo tlhelela ekaya wu ta hetiseka.—Yeremiya 31:16, 17.

Leswi Xikwembu xi swi tshembiseke Vaisrayele xi swi endlile. Hilaha xi profeteke hakona, Babilona u hluriwe hi Hosi ya Muperesiya ku nga Korexe. (Esaya 45:1, 2; Yeremiya 51:30-32) Endzhaku ka sweswo Korexe u pfumelele Vayuda leswaku va tlhelela ekaya. Endzhaku ka malembe ya 70 va ri evuhlongeni, va tlhelele eYerusalema.—2 Tikronika 36:20-23; Ezra 3:1.

Ku hetiseka ka xitshembiso lexi nga eka Yeremiya 29:11 swi tiyisa lava tshembaka switshembiso swa Xikwembu namuntlha. Switshembiso leswi swi katsa mhaka ya leswaku Mfumo wa Xikwembu lowu nga ta fumiwa hi Kreste Yesu wu ta tisa ku rhula emisaveni.—Pisalema 37:10, 11, 29; Esaya 55:11; Matewu 6:10.

Mavunwa Lama Vuriwaka Mayelana Na Yeremiya 29:11

Mavunwa: Xikwembu xi ‘kunguhatele’ un’wana ni un’wana wa hina swo karhi.

Ntiyiso: Xikwembu xi pfumelela vanhu ku tihlawulela ndlela leyi va lavaka ku hanya ha yona. Marito lama nga eka Yeremiya 29:11 a xi ma kongomise eka ntlawa wa Vaisrayele eBabilona naswona a xi tshembise leswaku xi ta nyika ntlawa wolowo ku rhula enkarhini lowu taka. (Yeremiya 29:4) Hambiswiritano, Xikwembu xi pfumelele munhu ha un’we leswaku a hlawula loko a lava ku vuyeriwa eka xitshembiso xa Xona. (Deteronoma 30:19, 20; Yeremiya 29:32) Lava hlawuleke ku lava Xikwembu va endle tano hi ku khongela eka xona hi timbilu hinkwato.—Yeremiya 29:12, 13.

Mavunwa: Xikwembu xi ta katekisa vagandzeri va xona hi rifuwo.

Ntiyiso: Rito “katekisa” leri kumekaka eka Tibibele tin’wana eka Yeremiya 29:11 ri hundzuluxeriwe ri suka eka rito ra Xiheveru leri vulaka “ku rhula, rihanyo lerinene ni ku va ni vutomi lebyinene.” Hi ku ya hi mongo wa kona, Xikwembu a xi tshembisanga Vaisrayele lava a va yisiwe evuhlongeni rifuwo kambe xi va tshembise ku rhula ni vutomi lebyinene. A va ta hanya naswona siku rin’wana a va ta tlhelela eYerusalema.—Yeremiya 29:4-10.

Hlaya Yeremiya ndzima 29 swin’we ni tinhlamuselo ta le hansi ni tivhese leti fambisanaka na ndzima leyi.

a Yehovha i vito ra Xikwembu.—Pisalema 83:18.

b Loko The Expositor’s Bible Commentary yi vulavula hi Yeremiya 29:11, yi ri: “Lexi i xin’wana xa switshembiso swo tsakisa swinene leswi kumekaka eBibeleni leswi kombiseke tintswalo ta Yahweh [Yehovha] eka mahlonga lawa naswona u va nyike xivangelo lexi tiyeke xa leswaku va ta hetelela va ntshunxiwile.—Vholomo 7, tluka 360.