•   Munghana wa wena wa vukati u rhandza ku pulana swilo ka ha ri na nkarhi, kasi eka wena a swi tano.

•   A wu swi rhandzi ku vulavula kambe munghana wa wena wa vukati u vulavula ngopfu.

 Xana nkataku u ni mukhuva lowu nga ku tsakisiki? Ku tshamela ku ehleketa hi wona swi nga onha vukati bya n’wina. Entiyisweni, Bibele yi vula leswaku “loyi a tshamelaka ku vulavula hi xihoxo u hambanisa vanghana lavakulu.”—Swivuriso 17:9.

 Ematshan’weni yo pfumelela mukhuva lowu nga ku tsakisiki wu ku hambanisa ni nkataku, kumbexana u nga dyondza ku langutisa mukhuva wolowo hi tihlo ra kahle.

Eka nhlokomhaka leyi

•  Ndlela leyinene yo languta mikhuva leyi nga ku tsakisiki

•  Leswi vatekani va swi vulaka

•  Mabulo lama nga pfunaka

 Mukhuva lowu u nga wu rhandziki eka munghana wa wena wa vukati swi nga endleka wu fambisana ni vumunhu lebyi u byi tsakelaka eka yena. Kambisisa swikombiso leswi swinharhu:

 “Nuna wa mina hakanyingi wa nonoka eku endleni ka swilo kumbe ku tilunghisa loko hi lava ku ya kun’wana. Kambe sweswo swi endla a va ni mbilu yo leha, a tlhela a ndzi lehisela mbilu. Mikarhi yin’wana ku nonoka kakwe a ku ndzi tsakisi kambe ku wela eka swin’wana leswi endlaka ndzi n’wi rhandza.”—Chelsea.

 “Nkatanga u endla swilo hi ku hleleka naswona u lava ku vona swilo hinkwaswo swi tshamisekile, mikarhi yin’wana sweswo a swi ndzi tsakisi. Kambe hi hala tlhelo, sweswo swi n’wi endla a tshama a lunghekile.”—Christopher.

 “Nuna wa mina u na muhoni naswona sweswo swi ndzi heta matimba. Hi hala tlhelo, ku endla swilo a nga jahanga hi xin’wana xa swilo leswi endleke ndzi n’wi rhandza. Ndzi tsakisiwa hi vuswikoti byakwe bya ku va ni ku rhula eka swiyimo swo tika.”—Danielle.

 Chelsea, Christopher na Danielle va dyondze leswaku vumunhu lebyi va nga byi rhandziki eka vanghana va vona va vukati, ku tlhela ku va byona lebyi pfunaka. Loko swi ri tano, u nge swi koti ku susa leswi u nga swi rhandziki u siya leswi u swi rhandzaka, ku fana ni leswi swi nga kotekiki ku lahla tlhelo lerin’wana ra mali ya nsimbhi u siya lerin’wana.

 Entiyisweni, a hi mikarhi hinkwayo mikhuva yin’wana leyi nga tsakisiki yi pfunaka. Hi xikombiso, Bibele ya pfumela leswaku vanhu van’wana va ‘hatla va kariha.’ (Swivuriso 29:22) Loko swi ri tano, munhu u fanele a tikarhatela ku tshika ku “leva hinkwako, ku hlundzuka, vukarhi, huwa ni nhlambha.” a—Vaefesa 4:31.

 Kambe loko mukhuva wa kona wu nga ku tsakisi, landzela xitsundzuxo xa Bibele lexi nge: “Yanani emahlweni mi lehiselana mbilu . . . hambiloko munhu a ri ni xivangelo xa ku vilerisiwa hi un’wana.”—Vakolosa 3:13.

 Ku engetela kwalaho, ringeta ku lava mukhuva lowunene lowu endleke leswaku u n’wi rhandza. Wanuna la vuriwaka Joseph u ri: “Ku tshamela ku ehleketa hi mukhuva lowu u nga wu rhandziki swi fana ni ku vona ntsena laha dayimani yi nga tsemiwangiki kahle kambe u rivala hi ku saseka ka yona.”

 Xo sungula, un’wana ni un’wana wa n’wina a nga kambisisa swivutiso leswi landzelaka a ri yexe. Kutani mi bula swin’we hi tinhlamulo ta swona.

•   Xana nkataku u ni mukhuva lowu u vonaka onge wu vanga timholovo evukatini bya n’wina? Loko swi ri tano, hi wihi mukhuva wa kona?

•   Xana mukhuva wa kona wu bihe ngopfu kumbe wena wo ka wu nga ku tsakisi?

•   Xana ku ni nchumu lowu nga wunene hi mukhuva wolowo? Loko swi ri tano, hi wihi nchumu wa kona naswona hikwalahokayini u byi teka byi ri bya nkoka vumunhu bya nkataku?