Bibele Yi Ri Yini Hi Ti-dinosaur?
Nhlamulo ya Bibele
A ku kona eBibeleni laha ku vulavuriwaka hi ti-dinosaur. Hambiswiritano, Bibele yi vula leswaku Xikwembu xi “tumbuluxe swilo hinkwaswo,” kutani swi le rivaleni leswaku na tona i tin’wana ta leswi xi swi tumbuluxeke. a (Nhlavutelo 4:11) Bibele a yi vulavuli hi ti-dinosaur hi ku kongoma kambe yi vulavula hi mixaka ya swivumbiwa leswi nga ha endlekaka ti katseka eka swona:
“Swivandzana leswikulu swa le lwandle.”—Genesa 1:21.
“Swiharhi leswi famba-fambaka swa misava.”—Genesa 1:25.
“Swivandzana swa misava.”—Genesa 1:25.
Xana ti-dinosaur ti tumbuluke eka swiharhi swin’wana?
Hi ku ya hi matimu ya masalela ya leswi feke, ti-dinosaur a hi swiharhi swo karhi leswi nga lo hundzuka hi xitshuketa ivi swi va ti-dinosaur. Leswi swi fambisana ni rungula ra le Bibeleni leri kombisaka leswaku Xikwembu hi xona xi vumbeke swiharhi hinkwaswo. Hi xikombiso, Pisalema 146:6 yi vula leswaku Xikwembu i “Muendli wa tilo ni misava, wa lwandle ni hinkwaswo leswi nga eka swona.”
Xana ti-dinosaur ti hanye eka nguva yihi?
Bibele yi hlamusela leswaku swiharhi swa le lwandle ni leswin’wana swi vumbiwe hi siku ra vuntlhanu ni ra vutsevu ra ku tumbuluxa. b (Genesa 1:20-25, 31) Xisweswo, hi ku ya hi leswi Bibele yi swi vulaka hi ku tumbuluxiwa ka swilo, swi tikomba ti-dinosaur ti vumbiwe ku sukela kwale ku sunguleni.
Xana Behemoti Na Levhiyathani A Ku Ri Ti-dinosaur?
Doo! Hambileswi swiharhi leswi swi boxiweke ebukwini ya Yobo swi nga tiviwiki kahlekahle, hi ntolovelo Behemoti yi tiviwa yi ri mpfuvu kasi Levhiyathani yi ri ngwenya. Leswi swi fambisana kahle ni leswi Matsalwa ma swi hlamuseleke. (Yobo 40:15-23; 41:1, 14-17, 31) Hambiswiritano, vito “Behemoti” ni “Levhiyathani” a ma vuli ti-dinosaur. Xikwembu xi byele Yobo leswaku a xiya swiharhi leswi hi xiviri, naswona enkarhini wa Yobo a ku ri khale ti-dinosaur ti nyamalarile emisaveni.—Yobo 40:14; 41:6.
Ti helele kwihi ti-dinosaur?
Bibele a yi vuli nchumu hi ta ku nyamalala ka ti-dinosaur. Kambe yo vula ntsena leswaku swilo hinkwaswo swi vumbiwe “hikwalaho ka ku rhandza ka [Xikwembu],” naswona swi le rivaleni leswaku Xikwembu a xi ri ni xikongomelo xo vumba ti-dinosaur. (Nhlavutelo 4:11) Kutani loko xikongomelo xexo xi hetisekile, Xikwembu xi endle leswaku ti nyamalala.
a Matimu ya masalela ya leswi feke ma kombisa leswaku ti-dinosaur a ti ri kona. Entiyisweni, masalela ya swilo swo hambanahambana leswi feke ma tale ngopfu.
b EBibele, rito leri nge “siku” ri nga vula nkarhi wo leha lowu tekeke magidi ya malembe.—Genesa 1:31; 2:1-4; Vaheveru 4:4, 11.
U Nga Ha Tsakela
SWIVUTISO LESWI HLAMURIWAKA HI BIBELE
Xana Sayense Ya Pfumelelana Ni Bibele?
Xana Bibele ya hoxisa eka swa sayense?
TIVHIDIYO TA TIDYONDZO TA NKOKA LETI HUMAKA EBIBELENI
Xana Vuako Byi Lo Tumbuluxiwa?
Rungula ra le Bibeleni ra ku vulavula hi ku tumbuluxiwa ka swilo, vo tala a va ri twisisi kahle, van’wana va ehleketa leswaku leswi ri swi vulaka ko va ntsheketo. Xana leswi Bibele yi swi vulaka a swi twisiseki?
MASUNGULO YA VUTOMI—KUMA TINHLAMULO TA SWIVUTISO SWA NTLHANU
Swilo Leswi Hanyaka Swi Huma Kwihi?
Nhlamulo leyi nga ntiyiso yi nga khumba ndlela munhu a langutaka vutomi hayona.
ESSENTIAL BIBLE TEACHINGS
Hikwalaho Ka Yini Xikwembu Xi Tumbuluxe Misava?
Misava ya hina yi tele hi swilo swo saseka. Yi vekiwe endhawini leyi faneleke naswona yi rendzeleka hi rivilo leri ringaneke. Hikwalaho ka yini Xikwembu xi tikarhatile leswaku xi vumba misava?
XALAMUKA!
Leswi Vo Tala Va Nga Swi Tiviki Hi Ku Tumbuluxiwa Ka Swilo
Xana rungula ra le Bibeleni ra ku tumbuluxiwa ka swilo ra pfumelelana ni leswi vuriwaka hi sayense?
MALUNGHANA NA HINA
Kombela Ku Endzeriwa Hi Timbhoni Ta Yehovha
Kombela ku endzeriwa hi Timbhoni ta Yehovha leswaku ti ta dyondza na wena Bibele kumbe u tirhisa progreme ya hina yo dyondza Bibele.