Doo! Loko buku leyi nge, New Catholic Encyclopedia yi hlamusela milawu leyi Xikwembu xi nga yi nyika tiko ra Israyele yi ri: “Tibibele to hambana-hambana ti swi veka erivaleni leswaku vagandzeri va ntiyiso va Xikwembu a va nga xi gandzeli hi ku tirhisa swifaniso.” Xiya tindzimana leti ta Bibele:

•   “U nga tshuki u tiendlela xifaniso lexi vatliweke kumbe xivumbeko lexi fanaka ni xilo xihi ni xihi lexi nga ehenhla ematilweni kumbe lexi nga ehansi emisaveni kumbe ematini ehansi ka misava. U nga tshuki u swi nkhinsamela kumbe u yengiwa ku swi tirhela, hikuva mina Yehovha Xikwembu xa wena ndzi Xikwembu lexi lavaka ku tinyiketela loku hlawulekeke.” (Eksoda 20:4, 5) Tanihi leswi Xikwembu xi lavaka “ku tinyiketela loku hlawulekeke,” a swi xi tsakisi loko hi dzunisa kumbe hi gandzela swifaniso kumbe mimfungho.

•   “Ku dzunisa ka mina a ndzi ku nyiki swifaniso leswi vatliweke.” (Esaya 42:8) Xikwembu a xi swi lavi ku gandzeriwa hi ku tirhisa swifaniso. Loko Vaisrayele van’wana va ringete ku xi gandzela hi ku tirhisa xifaniso lexi n’okisiweke xa rhole, Xikwembu xi vule leswaku “va endle xidyoho lexikulu.”—Eksoda 32:7-9, Easy-to-Read Version.

•   “A hi fanelanga hi anakanya leswaku Muhanyi loyi a nga Xikwembu u fana ni nsuku kumbe silivhere kumbe ribye, ku fana ni nchumu lowu vatliweke hi vutshila ni makungu ya munhu.” (Mintirho 17:29) Ku hambana ni vugandzeri bya vuhedeni lebyi hakanyingi byi tirhisaka swifaniso leswi “vatliweke hi vutshila ni makungu ya munhu,” Vakreste va fanele va “famba hi ripfumelo ku nga ri hi ku vona,” hilaha Bibele yi vula hakona.—2 Vakorinto 5:7.

•   “Tivoneleni swifaniso.” (1 Yohane 5:21) Eka milawu leyi nyikiweke tiko ra Israyele ni Vakreste, Bibele yi vula hi ku phindha-phindha leswaku dyondzo leyi vulaka leswaku Xikwembu xa swi amukela ku tirhisiwa ka swifaniso ni mimfungho evugandzerini i ntsheketo.