Ku “vulavula hi tindzimi” i vuswikoti bya singita lebyi Vakreste va le nkarhini wa vaapostola va veke na byona, byo vulavula ririmi leri va nga si tshamaka va ri dyondza. (Mintirho 10:46) Hinkwavo lava vulavulaka ririmi ro karhi a va n’wi twa kahle munhu loyi a a vulavula ririmi ra vona. (Mintirho 2:4-8) Ku vulavula hi tindzimi a ku ri yin’wana ya tinyiko ta moya lowo kwetsima leyi Xikwembu xi yi nyikeke Vakreste vo sungula.—Vaheveru 2:4; 1 Vakorinto 12:4, 30.

•  Ku vulavula hi tindzimi swi sungule kwihi naswona rini?

•  A xi ri xihi xikongomelo xo vulavula hi tindzimi?

•  Xana vadyondzisiwa a va ta tshama va ri karhi va vulavula hi tindzimi?

•  Xana ku vulavula hi tindzimi swi hele rini?

•  Ku vuriwa yini hi mhaka ya ku vulavula hi tindzimi namuntlha?

•  Hi nga va tiva njhani Vakreste va ntiyiso?

 Singita leri ri humelele ro sungula eYerusalema nimixo hi siku ra Nkhuvo wa Xiyuda wa Pentekosta hi 33 C.E. Vadyondzisiwa va Yesu va kwalomu ka 120 a va hlengeletanile loko “hinkwavo va tala moya lowo kwetsima, va sungula ku vulavula hi tindzimi to hambana-hambana.” (Mintirho 1:15; 2:1-4) Ntshungu lowukulu lowu humaka eka “tiko rin’wana ni rin’wana ra lava nga ehansi ka tilo” a wu hlengeletanile, naswona “un’wana ni un’wana a a va twa va vulavula hi ririmi ra yena.”—Mintirho 2:5, 6.

1.   Ku kombisa leswaku Xikwembu a xi va seketela Vakreste. Khale Xikwembu xi va endlele swikombiso swa masingita leswaku va swi tiva ku hi xona xi pfunaka vanhu vo tshembeka vo tanihi Muxe. (Eksoda 4:1-9, 29-31; Tinhlayo 17:10) Ku vulavula hi tindzimi na kona a ku ri xin’wana xa swikombiso leswi kombisaka leswaku Xikwembu a xi seketela mavandlha lawa a ma ha ku sungula. Muapostola Pawulo u tsale leswi: “Tindzimi a hi xikombiso eka vapfumeri, kambe eka lava nga riki vapfumeri, kasi ku profeta a hi ka lava nga riki vapfumeri, kambe i ka vapfumeri.”—1 Vakorinto 14:22.

2.   Leswaku Vakreste va kota ku chumayela hi rixaladza. Lava va tweke valandzeri va Yesu hi siku ra Pentekosta va te: “Vakreta ni Vaarabiya, hi va twa va vulavula tindzimi ta hina malunghana ni swilo leswikulu ngopfu swa Xikwembu.” (Mintirho 2:11) Xisweswo, xikongomelo xin’wana xa singita leri, a ku ri ku endlela leswaku Vakreste va “nyikela vumbhoni bya rixaladza” ni ku “endla vanhu va matiko hinkwawo va va vadyondzisiwa,” hilaha Yesu a va leriseke ha kona. (Mintirho 10:42; Matewu 28:19) Kwalomu ka vanhu va 3 000 lava voneke singita leri ni ku twa vumbhoni lebyi nyikeriweke va ve vadyondzisiwa siku rolero.—Mintirho 2:41.

 Doo, nyiko ya moya lowo kwetsima, ku katsa ni ya ku vulavula hi tindzimi a ku ri ya xinkarhana. Bibele yi te: “Hambi ku ri ni tinyiko ta ku profeta, ti ta hela; hambi ku ri ni tindzimi, ti ta hela.”—1 Vakorinto 13:8.

 Hi ntolovelo vaapostola a va hundzisele tinyiko ta moya lowo kwetsima eka Vakreste van’wana, a va tlhandleka vapfumerikulobye mavoko. (Mintirho 8:18; 10:44-46) Lava nga kuma tinyiko ta moya lowo kwetsima eka vaapostola a va nga swi koti ku ti hundzisela eka van’wana. (Mintirho 8:5-7, 14-17) Hi xikombiso, mutirhelamfumo a nga nyika munhu wo karhi layisense yo chayela movha, kambe munhu la kumeke layisense a nga na wona matimba yo nyika un’wana layisense yo chayela. Swi tano ni hi ku vulavula hi tindzimi, swi herile loko vaapostola swin’we ni lava va kumeke nyiko yoleyo va file.

 Nyiko ya singita yo vulavula tindzimi yi hele kwalomuya ku heleni ka lembe-xidzana ro sungula C.E. Namuntlha a nga kona la nga vulaka leswaku u vulavula hi matimba ya xikwembu. a

 Yesu u vule leswaku vadyondzisiwa vakwe va ta tiviwa hi rirhandzu. (Yohane 13:34, 35) Hilaha ku fanaka, muapostola Pawulo u dyondzise leswaku Vakreste a va ta tiviwa hi ku rirhandzu. (1 Vakorinto 13:1, 8) U kombise leswaku moya wa Xikwembu a wu ta endla leswaku Vakreste va va ni timfanelo leti hinkwato ka tona ti vuriwaka “mihandzu ya moya,” wo sungula wa kona ku nga rirhandzu.—Vagalatiya 5:22, 23.