Doo! Misava a yi nge pfuki yi herisiwile kumbe ku hisiwa hi ndzilo hambi ku ri ku siviwa hi yin’wana. Bibele yi dyondzisa leswaku Xikwembu xi tumbuluxe misava leswaku ku tshamiwa eka yona hilaha ku nga heriki.

•   “Lavo lulama va ta tshama emisaveni, va ta hanya eka yona hilaha ku nga heriki.”—Pisalema 37:29.

•   “[Xikwembu xi] tiyise masungulo ya misava; a yi nge susiwi endhawini ya yona hilaha ku nga heriki.”—Pisalema 104:5.

•   “Misava yi tshama hilaha ku nga heriki.”—Eklesiasta 1:4.

•   ‘Loyi a vumbeke misava ni Muendli wa yona, loyi a yi simekeke yi tiya, a nga yi tumbuluxelanga swa hava, kambe u yi vumbele leswaku ku tshamiwa eka yona.’—Esaya 45:18.

 Xikwembu a xi nge va pfumeleli vanhu va onha misava hilaha ku heleleke hi ku yi thyakisa, hi nyimpi kumbe hi ku tirhisa tindlela tin’wana. Kambe, xi ta “lovisa lava onhaka misava.” (Nhlavutelo 11:18) Xi ta swi endlisa ku yini sweswo?

 Xikwembu xi ta veka Mfumo wa xona wa le tilweni lowu nga ta siva mifumo ya vanhu leyi tsandzekaka ku sirhelela misava. (Daniyele 2:44; Matewu 6:9, 10) Hosi ya Mfumo wolowo i Yesu Kreste N’wana wa Xikwembu. (Esaya 9:6, 7) Loko Yesu a ri emisaveni, hi singita u tirhise matimba yakwe leswaku a lawula ntumbuluko. (Marka 4:35-41) Tanihi Hosi ya Mfumo wa Xikwembu, Yesu u ta lawula misava ni hinkwaswo leswi nga eka yona. U ta tlhela a endla misava yi va hi ndlela leyi a yi ri xiswona entangeni wa Edeni.—Matewu 19:28; Luka 23:43.

 Doo! A yi swi dyondzisi sweswo. Dyondzo leyi, leyi yi nga riki ntiyiso swi nga endleka yi vangiwa hi matwisiselo lama hoxeke ya tsalwa ra 2 Petro 3:7, leri nge: “Matilo ni misava leyi nga kona sweswi swi hlayiseriwe ndzilo.” Twana tinhla timbirhi ta nkoka leti hi pfunaka ku twisisa mongo wa tsalwa leri:

1.   Bibele yi tirhisa rito “matilo,” “misava” ni “ndzilo” hi tindlela to hambanahambana. Hi xikombiso, Genesa 11:1 yi ri: “Misava hinkwayo yi ya emahlweni yi vulavula ririmi rin’we.” Laha, rito “misava” ri kombetela eka vanhu.

2.   Mongo wa 2 Petro 3:7 wu kombisa nhlamuselo ya rito matilo, misava ni ndzilo leswi boxiweke eka tsalwa leri. Ndzimana 5 na 6 yi fanisa leswi nga ta endleka ni leswi endlekeke enkarhini wa Ndhambi ya Nowa. Hi nkarhi wa ndhambi yoleyo, vanhu va nkarhi wolowo va lovisiwile kambe misava a yi herisiwanga. Kambe Ndhambi yi kukule “misava” kumbe vanhu lava a va ri ni madzolonga yi va lovisa. (Genesa 6:11) Ndhambi yi tlhele yi lovisa ni “matilo” ku nga vanhu lava a va fuma vanhu. Kambe vanhu vo homboloka va lovisiwile, misava ya hina yi sala. Nowa ni ndyangu wakwe va ponile loko misava yi lovisiwa naswona va ye emahlweni va tshama eka yona endzhaku ka Ndhambi.—Genesa 8:15-18.

 Hilaha mati ya Ndhambi ma loviseke misava ha yona, ni ndzilo lowu boxiweke eka 2 Petro 3:7 wu ta lovisa misava yo homboloka ku nga ri pulanete ya hina. Xikwembu xi tshembisa “matilo lamantshwa ni misava leyintshwa” leswi eka swona ku nga ta “va ni ku lulama.” (2 Petro 3:13) “Misava leyintshwa” kumbe vanhu, va ta fumiwa hi “matilo lamantshwa” kumbe mfumo lowuntshwa ku nga Mfumo wa Xikwembu. Loko ku fuma Mfumo wolowo, misava yi ta va paradeyisi.—Nhlavutelo 21:1-4.