Xikwembu xa byi amukela vukati bya wanuna ni wansati va rixaka leri hambaneke hikuva tinxaka hinkwato ta ringana eka xona. Bible yi ri: “Xikwembu a xi yi hi nghohe . . ., xi amukela vanhu va tinxaka hikwato.”—Mintirho 10:34, 35, Good News Translation.

 Kambisisa yin’wana ya milawu ya Bibele leyi kombisaka ku ringana ka tinxaka ni vukati.

 Vanhu hinkwavo va huma eka wanuna wo sungula, Adamu ni nsati wakwe Evha, loyi Bibele yi n’wi vitanaka “mana wa hinkwavo lava hanyaka.” (Genesa 3:20) Hikwalaho ka xivangelo lexi, Bibele yi vula leswi malunghana ni Xikwembu: “Hi munhu un’we xi endle matiko hinkwawo ya vanhu.” (Mintirho 17:26) Vanhu hinkwavo i xiphemu xa ndyangu wun’we, ku nga khathariseki rixaka ra vona. Kambe ku vuriwa yini loko endhawini leyi u tshamaka eka yona ku ri ni xihlawuhlawu kumbe ku hambana hi swiyimo?

 Hambileswi Xikwembu xi amukelaka ku tekana ka vanhu va tinxaka to hambana, a hi vanhu hinkwavo lava nga ni vonelo leri fanaka. (Esaya 55:8, 9) Loko u kunguhata ku nghenela vukati ni munhu wa rixaka rin’wana, wena swin’we ni munghana yoleyo mi fanele mi bula hi leswi landzelaka:

•   Xana mi ta langutana njhani ni ntshikilelo lowu mi nga ha vaka na wona endhawini leyi mi tshamaka eka yona kumbe lowu vangiwaka hi swirho swa ndyangu?

•   Mi ta va pfuna njhani vana va n’wina leswaku va langutana ni ntlhontlho wa xihlawuhlawu?

‘Ku kanela swin’we’ hi mhaka leyi swi nga mi pfuna leswaku swi mi fambela kahle evukatini.—Swivuriso 13:10; 21:5.