A ku na munhu loyi a tshameke a vona Xikwembu. (Eksoda 33:20; Yohane 1:18; 1 Yohane 4:12) Bibele yi vula leswaku “Xikwembu i Moya” ku nga vutomi lebyi nga voniwiki hi mahlo ya nyama.—Yohane 4:24; 1 Timotiya 1:17.

 Xikwembu xi nga voniwa hi tintsumi hikuva i swivumbiwa swa moya. (Matewu 18:10) Ku tlula kwalaho, vanhu van’wana lava faka va ta pfuxeriwa etilweni va ri ni miri wa moya naswona va ta kota ku vona Xikwembu.—Vafilipiya 3:20, 21; 1 Yohane 3:2.

 Hakanyingi Bibele yi vulavula hi ku vona hi ndlela yo fanekisela leswaku yi kombisa ku vonakala. (Esaya 6:10; Yeremiya 5:21; Yohane 9:39-41) Hi ndlela yoleyo, munhu a nga vona Xikwembu sweswi hi ‘mahlo ya mbilu’ hi ku va ni ripfumelo a tiva Xikwembu a tlhela a tlangela timfanelo ta xona. (Vaefesa 1:18) Bibele yi hlamusela leswi u nga swi endleka leswaku u va ni ripfumelo ro tano.

•   Dyondza hi timfanelo ta Xikwembu to tanihi rirhandzu, ku hanana swin’we ni vutlhari ni matimba eka ntumbuluko wa xona. (Varhoma 1:20) Endzhaku ka loko Yobo wanuna wo tshembeka a tsundzuxiwe hi mintirho ya Xikwembu yo hlamarisa, u titwe onge Xikwembu a xi ri emahlweni ka yena.—Yobo 42:5.

•   Tiva Xikwembu hi ku dyondza Bibele. Bibele yi hi tiyisekisa yi ku: ‘Loko u lavisisa Xikwembu, xi ta endla leswaku u xi kuma.’—1 Tikronika 28:9; Pisalema 119:2; Yohane 17:3.

•   Dyondza hi Xikwembu eka vutomi bya Yesu. Leswi Yesu a byi kombiseke kahle vumunhu bya Tata wakwe Yehovha Xikwembu, u vule swi fanerile a ku: “Loyi a ndzi voneke u vone na Tatana.”—Yohane 14:9.

•   Hanya hi ndlela leyi tsakisaka Xikwembu naswona u vona ndlela leyi xi nga ta angula ha yona. Yesu u te: “Va tsaka lavo tenga embilwini, hikuva va ta vona Xikwembu.” Hilaha swi vuriweke ha kona eku sunguleni, vanhu van’wana lava tsakisaka Xikwembu va ta pfuxeriwa etilweni naswona va ta “vona Xikwembu.”—Matewu 5:8; Pisalema 11:7.

 Eka rungula leri swi tikombaka onge Bibele yi vula leswaku vanhu va vone Xikwembu hi ku kongoma, mongo wa kona hileswaku Xikwembu a xi yimeriwa hi ntsumi kumbe xi humelela hi xivono.

 Tintsumi.

Eminkarhini ya khale, Xikwembu a xi tirhisa tintsumi tanihi vayimeri va xona leswaku ti ya eka vanhu naswona ti ya vulavula hi vito ra xona. (Pisalema 103:20) Hi xikombiso, Xikwembu xi tshame xi vulavula na Muxe exihlahleni lexi a xi pfurha naswona Bibele yi vula leswaku ‘Muxe u tumbete xikandza xakwe hikuva a a chava ku languta Xikwembu xa ntiyiso.’ (Eksoda 3:4, 6) Muxe a nga vonanga Xikwembu hi ku kongoma, kambe mongo wa mhaka hileswaku u vone “ntsumi ya Yehovha.”—Eksoda 3:2.

 Hilaha ku fanaka, loko Bibele yi vula leswaku Xikwembu xi ‘vulavule na Muxe va langutanile,’ swi vula leswaku a xi vulavula na Muxe hi ku ntshunxeka. (Eksoda 4:10, 11; 33:11) Entiyisweni Muxe a nga vonanga xikandza xa Xikwembu kambe rungula ra xona leri a ri kumeke ri “hundzisiwe hi tintsumi.” (Vagalatiya 3:19; Mintirho 7:53) Hambiswiritano, ripfumelo ra Muxe eka Xikwembu a ri tiyile hikuva Bibele yi vula leswaku a “a vona Loyi a nga vonakiki.”—Vaheveru 11:27.

 Xikwembu xi vulavule na Abrahama hi ku tirhisa tintsumi hilaha xi endleke ha kona loko xi vulavula na Muxe. Loko u hlaya Bibele u nga anakanyisisi, u nga ha vula leswaku Abrahama u vone Xikwembu hi ku kongoma. (Genesa 18:1, 33) Hambiswiritano, mongo wa mhaka wu kombisa leswaku “vavanuna vanharhu” lava yeke eka Abrahama, entiyisweni a ku ri tintsumi leti rhumeriweke hi Xikwembu. Abrahama u swi xiyile leswaku i vayimeri va Xikwembu naswona u vulavule na vona onge hiloko a vulavula na Yehovha hi ku kongoma.—Genesa 18:2, 3, 22, 32; 19:1.

 Swivono.

Nakambe Xikwembu a xi humelela eka vanhu hi swivono emianakanyweni ya munhu. Hi xikombiso, loko Bibele yi vula leswaku Muxe ni Vaisrayele van’wana “va von[e] Xikwembu xa Israyele,” yi vula leswaku va “vone xivono xa Xikwembu xa ntiyiso.” (Eksoda 24:9-11) Hilaha ku fanaka, minkarhi yin’wana Bibele yi vula leswaku vaprofeta va “vone Yehovha.” (Esaya 6:1; Daniyele 7:9; Amosi 9:1) Eka rungula rin’wana ni rin’wana leri ku vulavuriweke ha rona laha henhla, mongo wa kona wu kombisa leswaku a va nyikiwe xivono xa Xikwembu ku nga ri ku xi vona hi ku kongoma.—Esaya 1:1; Daniyele 7:2; Amosi 1:1.