Ina, xa ri cinca langutelo ra xona loko vanhu va cinca mahanyelo ya vona. Hi xikombiso, loko Xikwembu xi rhumele rungula ra vuavanyisi eka Vaisrayele va khale, xi te: “Kumbexana va ta yingisa kutani va tlhela, un’wana ni un’wana endleleni yakwe yo biha, kutani ndzi ta tisola hi khombo leri ndzi ehleketaka ku va tisela rona, hikwalaho ka vubihi bya swiendlo swa vona.”—Yeremiya 26:3.

 Vuhundzuluxeri byo tala bya Bibele byi hundzuluxela ndzimana leyi hi ku vula leswaku Xikwembu a xi ta “hundzuka” eka khombo leri a xi lava ku ri tisa, leswi a swi ta vula leswaku xi endle xihoxo. Hambiswiritano, rito rero hi Xiheveru ri nga ha vula “ku cinca ka mianakanyo kumbe xikongomelo.” Xidyondzeki xin’wana xi tsale leswi: “Ku cinca ka mahanyelo ya munhu ku nga endla leswaku Xikwembu xi cinca vuavanyisi bya xona.”

 Entiyisweni, hambileswi Xikwembu xi nga kotaka ku cinca mianakanyo ya xona, sweswo a swi vuli swona leswaku xi fanele xi yi cinca. Xiya swiyimo swin’wana swa le Bibeleni laha yi vulaka leswaku Xikwembu a xi yi cincanga mianakanyo ya xona:

•   Xikwembu a xi n’wi pfumelelanga Balaka leswaku a cinca mianakanyo ya xona leswaku a rhukana tiko ra Israyele.—Tinhlayo 23:18-20.

•   Loko Hosi Sawulo wa le Israyele a sungule ku endla swilo swo biha, Xikwembu a xi cincanga mianakanyo ya xona yo n’wi susa tanihi hosi.—1 Samuwele 15:28, 29.

•   Xikwembu xi ta hetisisa xitshembiso xa xona xo endla leswaku N’wana wa xona a va muprista hilaha ku nga heriki. Xikwembu a xi nge pfuki xi cince mianakanyo ya xona.—Pisalema 110:4.

 Ina, Bibele yi vula leswi hi Xikwembu: “Hi mina Yehovha; a ndzi hundzukanga.” (Malakiya 3:6) Hilaha ku fanaka, Bibele yi vula leswaku Xikwembu a xi “cinca-cinci ku fana ni ku hundzuluka ka ndzhuti.” (Yakobo 1:17) Leswi a swi kombisi leswaku Bibele ya tikaneta malunghana ni ku va Xikwembu xi cincacinca mianakanyo ya xona. Vumunhu bya Xikwembu a byi cinci, leswi vulaka leswaku milawu ya xona ya rirhandzu ni vululami a swi cinci. (Deteronoma 32:4; 1 Yohane 4:8) Hambiswiritano, xi nga nyika vanhu swileriso leswi nga faniki hi minkarhi yo hambanahambana. Hi xikombiso, Xikwembu xi nyike Hosi Davhida swileriso leswi nga faniki loko a lwa tinyimpi timbirhi hi ku landzelelana kambe swileriso sweswo swi tirhile leswaku a kota ku hlula.—2 Samuwele 5:18-25.

 Doo kambe xa tisola hileswi vanhu va nga xi yingisiki kumbe va xi fularhelaka. Loko Bibele yi hlamusela swiyimo swa le mahlweni ka Ndhambi ya le nkarhini wa Nowa, yi ri: “Yehovha a tisola leswi a endleke vanhu emisaveni, kutani a vaviseka embilwini yakwe.” (Genesa 6:6) Eka ndzimana leyi, rito “tisola” ri huma eka rito ra Xiheveru leri vulaka ku “cinca mianakanyo.” Xikwembu xi cince mianakanyo ya xona hi vanhu vo tala lava hanyeke emahlweni ka ndhambi hileswi va veke vanhu vo biha. (Genesa 6:5, 11) Hambileswi a xi vavisekile hileswi vanhu va hlawuleke ku hanya hi ndlela yo biha, a xi ri cincanga langutelo ra xona hi vanhu hinkwavo. Entiyisweni, xi ponise vanhu eNdhambini hi ku tirhisa Nowa ni ndyangu wakwe.—Genesa 8:21; 2 Petro 2:5, 9.